തിരുവനന്തപുരം: ഡ്രൈവിങ് ടെസ്റ്റുകളും ഡ്രൈവിങ് പരിശീലനവും ഇന്നുമുതല്‍ പുനരാരംഭിക്കുന്നു. കോവിഡ് പ്രോട്ടോക്കോള്‍ പൂര്‍ണ്ണമായി പാലിച്ചു കൊണ്ടാവണം ടെസ്റ്റും പരിശീലനവും നടത്തേണ്ടതെന്നാണ് നിര്‍ദേശം. ലൈസന്‍സുകളുടെ കാലാവധി അവസാനിച്ച് പ്രായോഗിക പരീക്ഷയോടെ പുതുക്കാന്‍ അപേക്ഷിച്ചവര്‍ക്കുള്ള ടെസ്റ്റുകളാണ് ഇന്ന് ആരംഭിക്കുക.

ലോക്ഡൗണ്‍ തുടങ്ങിയതിന് മുമ്പ് പരീക്ഷയ്ക്ക് സ്ലോട്ട് ലഭിക്കുകയും ലോക്ഡൗണ്‍ കാലയളവില്‍ കാലാവധി അവസാനിച്ചതുമായ അപേക്ഷകരുടെ ബുദ്ധിമുട്ടുകള്‍ പരിഹരിച്ച് ടെസ്റ്റിനുള്ള സ്ലോട്ടുകള്‍ പുനഃക്രമീകരിക്കും. സ്‌ളോട്ടുകള്‍ സംബന്ധിച്ച വിവരങ്ങള്‍ മോട്ടോര്‍വാഹന വകുപ്പിന്റെ വെബ്സൈറ്റിലെ സിറ്റിസണ്‍ കോര്‍ണറിലെ ലൈസന്‍സ് ലിങ്കിലൂടെയും പരിവാഹന്‍ സൈറ്റില്‍ നേരിട്ടും ലഭ്യമാണ്. ഇതുപ്രകാരമുള്ള പരീക്ഷകള്‍ വ്യാഴാഴ്ച മുതല്‍ നടക്കും.

പരിശീലന വാഹനത്തില്‍ ഇന്‍സ്ട്രെക്ടറെ കൂടാതെ ഒരേ സമയം ഒരു പഠിതാവിനെ മാത്രമേ അനുവദിക്കൂ. കോവിഡ് മാനദണ്ഡങ്ങള്‍ പാലിക്കപ്പെടുന്നുവെന്ന് മോട്ടോര്‍ വാഹനവകുപ്പ് ഉദ്യോഗസ്ഥര്‍ ഉറപ്പു വരുത്തണമെന്ന് നിര്‍ദ്ദേശിച്ചിട്ടുണ്ടെന്ന് ഗതാഗത മന്ത്രി ആന്റണി രാജു അറിയിച്ചു.