വടകര: ദേശീയപാത സ്ഥലമെടുപ്പിനെതിരേ ജില്ലയില്‍ നടക്കുന്ന പ്രതിരോധ സമരങ്ങളോട് മുഖ്യധാരാ രാഷ്ട്രീയകക്ഷികള്‍ മുഖംതിരിക്കുന്നുവെന്ന് കര്‍മസമിതി. കര്‍മസമിതിയുടെ നേതൃത്വത്തില്‍ സര്‍വേ തടയല്‍ അടക്കമുള്ള സമരങ്ങള്‍ ഓരോ ദിവസവും നടക്കുമ്പോഴും രാഷ്ട്രീയ പാര്‍ട്ടികളുടെ നിസംഗത ചോദ്യം ചെയ്യപ്പെടുകയാണ്.
പുതിയ റോഡിന്റെ ഘടന പരസ്യപ്പെടുത്തുക, പുനരധിവാസ പാക്കേജ് പ്രഖ്യാപിക്കുന്നതുവരെ സര്‍വേ നിര്‍ത്തിവയ്ക്കുക, സമരസംഘടനകളുമായി പ്രശ്‌നം ചര്‍ച്ച ചെയ്യുക എന്നീ ആവശ്യങ്ങളാണ് സമരക്കാര്‍ ആവശ്യപ്പെടുന്നത്. അഴിയൂര്‍ മുതല്‍ വെങ്ങളം വരെ നിരവധി വീടുകളും കച്ചവടസ്ഥാപനങ്ങളും നഷ്ടപ്പെടുന്ന സാഹചര്യമുണ്ടായിട്ടും ഈ സ്ഥലങ്ങളിലുള്ള എം.എല്‍.എമാരും എം.പിയും പ്രശ്‌നപരിഹാരത്തിനായി ഇടപെടുന്നില്ലെന്നാണ് സമരക്കാര്‍ കുറ്റപ്പെടുത്തുന്നത്.
കഴിഞ്ഞ യു.ഡി.എഫ് ഭരണത്തില്‍ സമരത്തിലുണ്ടായിരുന്ന സി.പി.എം അവര്‍ക്ക് ഭരണം ലഭിച്ചതോടെ പിന്‍വലിഞ്ഞിരിക്കുകയാണ്. 30 മീറ്ററില്‍ നാലുവരിയാണ് പ്രായോഗികമെന്ന് പറഞ്ഞ സി.പി.ഐ നേതൃത്വവും റവന്യൂ വകുപ്പ് കയ്യിലുണ്ടായിട്ടും പ്രശ്‌നത്തില്‍ ഇടപെടുന്നില്ലെന്നും ആക്ഷേപമുണ്ട്. കര്‍മസമിതിയുടെ സമരങ്ങള്‍ക്ക് പിന്തുണ പ്രഖ്യാപിച്ച ബി.ജെ.പി നേതൃത്വവും കേന്ദ്രഭരണത്തിനു പിന്തുണ പ്രഖ്യാപിച്ച് മാറിനില്‍ക്കുകയാണെന്ന് സമരസമിതി കുറ്റപ്പെടുത്തി.
ജനകീയസമരങ്ങള്‍ ഏറ്റെടുക്കണമെന്ന് കെ.പി.സി.സി നിര്‍ദേശമുണ്ടെങ്കിലും കോണ്‍ഗ്രസ് നേതൃത്വം ദേശീപാത സമരത്തോട് മുഖംതിരിക്കുകയാണെന്നാണ് ആരോപണം. മുസ്‌ലിം ലീഗ് മലപ്പുറം ജില്ലയൊഴികെ മറ്റൊരിടത്തും സജീവമായി പ്രശ്‌നത്തില്‍ ഇടപെടുന്നില്ലെന്നും കര്‍മസമിതി കുറ്റപ്പെടുത്തി.
ഭരണം തങ്ങളുടെ കൈകളിലായിരുന്നിട്ടും പ്രശ്‌നം ചര്‍ച്ചകളിലൂടെ പരിഹരിക്കാന്‍ സി.പി.എം നേതൃത്വം തയാറാകുന്നില്ലെന്നാണ് കിടപ്പാടം നഷ്ടപ്പെടുന്ന പാര്‍ട്ടി അണികള്‍ പറയുന്നത്. ഇടത് അനുഭാവികളായ വ്യാപാരിവ്യവസായ സമിതിയുടെ നേതൃത്വത്തില്‍ കഴിഞ്ഞ ദിവസം ലാന്റ് അക്വിസിഷന്‍ തഹസില്‍ദാറുടെ ഓഫിസിനു മുന്നില്‍ സമരം നടത്തിയിരുന്നു.
എന്നാല്‍ വ്യാപാരി വ്യവസായി ഏകോപനസമിതി ഇക്കാര്യത്തില്‍ മൗനം പാലിക്കുന്നതില്‍ സംഘടനയില്‍ അംഗങ്ങളായ വ്യാപാരികള്‍ക്കിടയില്‍ അമര്‍ഷമുണ്ട്.
പ്രശ്‌നപരിഹാരത്തിന് എത്രയുംവേഗം ചര്‍ച്ചകള്‍ക്ക് തയാറാവണമെന്നും മുഖ്യധാര രാഷ്ട്രീയ കക്ഷികളുടെ പ്രദേശിക നേതൃത്വങ്ങള്‍ ഇക്കാര്യം ഉന്നത നേതൃത്വങ്ങളെ അറിയിക്കണമെന്നുമാണ് അണികള്‍ക്കിടയിലെ വികാരം.