തൊഴിൽ നഷ്ട ഇൻഷുറൻസ് പദ്ധതിയിൽ ചേർന്നില്ലെങ്കിൽ കാത്തിരിക്കുന്നത് വമ്പൻ പണി

യുഎഇയുടെ നിർബന്ധിത തൊഴിൽ നഷ്ട ഇൻഷുറൻസ് പദ്ധതിയിൽ ചേരാനുള്ള നീട്ടിയ സമയപരിധി അവസാനിക്കാൻ ഇനി ആഴ്ചകൾ മാത്രം. സ്വകാര്യ മേഖലയിലും ഫെഡറൽ ഗവൺമെന്റ് വകുപ്പുകളിലും ഫ്രീ സോണുകളിലും ജോലി ചെയ്യുന്ന ജീവനക്കാർ ഒക്‌ടോബർ 1-ന് മുമ്പ് ഇൻവോലന്ററി ലോസ് ഓഫ് എംപ്ലോയ്‌മെന്റ് (ഐ.എൽ.ഒ.ഇ - ILOE) സ്‌കീമിൽ സബ്‌സ്‌ക്രൈബ് ചെയ്യണം. നീട്ടി നൽകിയ സമയപരിധിയായ ഒക്‌ടോബർ 1-ന് മുമ്പ് പദ്ധതിയുടെ ഭാഗമായില്ലെങ്കിൽ പിഴയടക്കേണ്ടിവരും.

ജോലി നഷ്ട്ടമാകുമ്പോൾ മൂന്ന് മാസ കാലയളവിലേക്ക് സാമ്പത്തിക സഹായം വാഗ്ദാനം ചെയ്യുന്ന, ഏറ്റവും ചെലവ് കുറഞ്ഞ തൊഴിൽ സുരക്ഷാ പദ്ധതിയിലേക്ക് ഏകദേശം 5 ദശലക്ഷത്തോളം ആളുകൾ ഇതിനകം വരിക്കാരായിട്ടുണ്ട്.

ഈ പദ്ധതിയിലേക്ക് എങ്ങിനെയാണ് ചേരേണ്ടത്, ചേരാനുള്ള യോഗ്യത എന്താണ്, പ്രീമിയം എങ്ങിനെയാണ് അടക്കേണ്ടത്. ചേർന്നില്ലെങ്കിൽ എന്ത് സംഭവിക്കും തുടങ്ങിയ കാര്യങ്ങൾ നമുക്ക് നോക്കാം.

ഐ.എൽ.ഒ.ഇ-ലേക്ക് വരിക്കാരാകേണ്ടത് നിർബന്ധമാണോ?

അതെ. നിർബന്ധമാണ്. ഇത് സബ്‌സ്‌ക്രൈബുചെയ്യുന്നതിൽ പരാജയപ്പെട്ടാൽ ജീവനക്കാർ പിഴ നൽകേണ്ടിവരും.

ഹ്യൂമൻ റിസോഴ്‌സസ് ആൻഡ് എമിറേറ്റൈസേഷൻ മന്ത്രാലയത്തിൽ (MoHRE) രജിസ്റ്റർ ചെയ്യാത്ത ജീവനക്കാർക്ക് രജിസ്റ്റർ ചെയ്യാൻ കഴിയുമോ?

ഐ.എൽ.ഒ.ഇ വെബ്‌സൈറ്റിൽ പോസ്റ്റ് ചെയ്ത ഒരു അലേർട്ട് അനുസരിച്ച്, MoHRE-യിൽ രജിസ്റ്റർ ചെയ്യാത്ത കമ്പനികൾക്ക് അവരുടെ ജീവനക്കാർക്ക് വേണ്ടി സബ്‌സ്‌ക്രൈബ് ചെയ്യവുന്നതാണ്. ഇതിനായി, ഒരു അഭ്യർത്ഥന കത്ത് സഹിതം അവർ അവരുടെ ട്രേഡ് ലൈസൻസ് സമർപ്പിക്കേണ്ടതുണ്ട്.

ബന്ധപ്പെട്ട ശിക്ഷകൾ എന്തൊക്കെയാണ്?

• അവസാന സമയ പരിധിയായ ഒക്ടോബർ 1-ന് മുമ്പ് ഒരു ജീവനക്കാരൻ സ്കീമിലേക്ക് സബ്‌സ്‌ക്രൈബ് ചെയ്തില്ലെങ്കിൽ, 400 ദിർഹം പിഴ ചുമത്തും.
• ഒരു ജീവനക്കാരൻ സ്‌കീമിലേക്ക് സബ്‌സ്‌ക്രൈബ് ചെയ്‌തെങ്കിലും നിശ്ചിത തീയതി മുതൽ മൂന്ന് മാസത്തിലധികം പ്രീമിയം അടയ്ക്കുന്നതിൽ പരാജയപ്പെട്ടാൽ, ഇൻഷുറൻസ് സർട്ടിഫിക്കറ്റ് റദ്ദാക്കുകയും 200 ദിർഹം പിഴ ഈടാക്കുകയും ചെയ്യും.

പിഴ എങ്ങനെ ശേഖരിക്കും?

ജീവനക്കാർ പിഴ നേരിട്ട് അടക്കണം. നിശ്ചിത തീയതി മുതൽ മൂന്ന് മാസത്തേക്ക് പിഴ അടക്കുന്നതിൽ പരാജയപ്പെടുകയാണെങ്കിൽ തുക അവരുടെ വേതന സംരക്ഷണ സംവിധാനത്തിൽ നിന്നോ, എൻഡ്-ഓഫ്-സർവീസ് ഗ്രാറ്റുവിറ്റി അല്ലെങ്കിൽ മറ്റേതെങ്കിലും ഇതര മാർഗ്ഗം എന്നിവയിലൂടെ അവരുടെ വേതനത്തിൽ നിന്ന് കുറയ്ക്കും.

പിഴ അടക്കാത്തത് ഒരാളുടെ രാജ്യത്തെ തൊഴിൽ സാധ്യതകളെ ബാധിക്കുമോ?

അതെ. ഇതുമായി ബന്ധപ്പെട്ട് പുറപ്പെടുവിച്ച ഒരു മന്ത്രിതല പ്രമേയം അനുസരിച്ച്, നിർദിഷ്ട സമയപരിധിക്കുള്ളിൽ എല്ലാ പിഴകളും അടയ്ക്കുന്നതുവരെ ജീവനക്കാരന് പുതിയ വർക്ക് പെർമിറ്റിന് അർഹത ഉണ്ടായിരിക്കുന്നതല്ല.

സ്കീമിൽ നിന്ന് ഒഴിവാക്കപ്പെട്ടവർ ആരാണ്?

ഐ.എൽ.ഒ.ഇ വെബ്‌സൈറ്റ് അനുസരിച്ച്, താഴെ പറയുന്നവർ ഒഴിവാക്കപ്പെട്ട വിഭാഗങ്ങളാണ്

• നിക്ഷേപകർ (കമ്പനികളുടെ ഉടമകൾ)
• ഗാർഹിക സഹായികൾ
• താൽക്കാലിക കരാർ തൊഴിലാളികൾ
• 18 വയസ്സിന് താഴെയുള്ള കുട്ടികൾ
• പെൻഷന് അർഹതയുള്ളവരും പുതിയ ജോലിയിൽ ചേർന്നവരുമായ വിരമിച്ചവർ

ജീവനക്കാർ എങ്ങനെയാണ് സ്കീമിലേക്ക് വരിക്കാരാകുന്നത്?

സൗജന്യ ചാനലുകൾ വഴിയാണ് സ്‌കീമിൽ ചേരേണ്ടത്. ഇതിന് സേവന നിരക്കുകളൊന്നും നൽകേണ്ടതില്ല. ഐ.എൽ.ഒ.ഇ വെബ്‌സൈറ്റും ആപ്പും ഇതിനായി ഉപയോഗിക്കാം. ഇതിന് പുറമെ സ്‌കീമിൽ ചേരാവുന്ന മറ്റ് ചാനലുകൾ ഇനി പറയുന്നവയാണ്

• അൽ അൻസാരി എക്സ്ചേഞ്ച്
• തവ്ജീഹ്, തഷീൽ വ്യാപാര കേന്ദ്രങ്ങൾ
• എത്തിസലാത്ത് (ഉടൻ വരുന്നു)
• കിയോസ്കുകൾ (upay, MBMEPay)
• ബോട്ടിം (ഉടൻ വരുന്നു)

സ്കീം എങ്ങനെ പ്രവർത്തിക്കുന്നു?

ഐ.എൽ.ഒ.ഇ-ലേക്ക് വരിക്കാരാകാൻ ജീവനക്കാർ വളരെ കുറഞ്ഞ നിരക്കിലുള്ള പ്രീമിയം നൽകണം. അച്ചടക്ക നടപടിയോ രാജിയോ ഒഴികെയുള്ള കാരണങ്ങളാൽ ജോലി നഷ്‌ടപ്പെട്ടാൽ, അവർക്ക് മൂന്ന് മാസം വരെ സാമ്പത്തിക സഹായം ലഭിക്കും.

എപ്പോൾ മുതലാണ് നഷ്ടപരിഹാരത്തിന് അർഹത?

കുറഞ്ഞത് 12 മാസമെങ്കിലും സ്കീമിൽ വരിക്കാരായിട്ടുണ്ടെങ്കിൽ മാത്രമേ ജീവനക്കാർക്ക് നഷ്ടപരിഹാരത്തിന് അർഹതയുള്ളൂ. സ്‌കീമിന്റെ സബ്‌സ്‌ക്രിപ്‌ഷനുകൾ 2023 ജനുവരിയിലാണ് ആരംഭിച്ചത്. ഒരാൾ ജനുവരിയിൽ ഇത് സബ്‌സ്‌ക്രൈബ് ചെയ്‌താൽ, 2023 ഡിസംബറിന് ശേഷം ജോലി നഷ്‌ടപ്പെട്ടാൽ മാത്രമേ അയാൾ/അവൾ നഷ്ടപരിഹാരത്തിന് അർഹനാകൂ. ഈ മാസം (സെപ്റ്റംബറിൽ) ഒരു വ്യക്തി സ്‌കീമിലേക്ക് സബ്‌സ്‌ക്രൈബുചെയ്യുകയാണെങ്കിൽ സെപ്തംബർ മുതൽ 12 മാസങ്ങൾക്ക് ശേഷം മാത്രമേ നഷ്ടപരിഹാരത്തിന് യോഗ്യനാകൂ.

രണ്ട് ഐ.എൽ.ഒ.ഇ പ്ലാനുകളും അവയുടെ നേട്ടങ്ങളും എന്തൊക്കെയാണ്?

• വിഭാഗം എ: അടിസ്ഥാന ശമ്പളം ദിർഹം 16,000 അല്ലെങ്കിൽ അതിൽ താഴെ

ചെലവ്: പ്രതിമാസം 5 ദിർഹം + വാറ്റ്

നഷ്ടപരിഹാര ആനുകൂല്യം: അടിസ്ഥാന ശമ്പളത്തിന്റെ 60%; പ്രതിമാസം 10,000 ദിർഹം വരെ

• കാറ്റഗറി ബി: അടിസ്ഥാന ശമ്പളം 16,000 ദിർഹത്തിന് മുകളിൽ

ചെലവ്: പ്രതിമാസം 10 ദിർഹം + വാറ്റ്

നഷ്ടപരിഹാര ആനുകൂല്യം: അടിസ്ഥാന ശമ്പളത്തിന്റെ 60%; പ്രതിമാസം 20,000 ദിർഹം വരെ

ശ്രദ്ധിക്കുക: ഇൻഷുറൻസ് പ്രീമിയങ്ങൾ മാസത്തിലോ ത്രൈമാസത്തിലോ അർദ്ധവാർഷികത്തിലോ വാർഷികത്തിലോ അടയ്ക്കാം.

എത്ര കാലത്തേക്ക് ആനുകൂല്യങ്ങൾ വാഗ്ദാനം ചെയ്യും?

മൂന്ന് മാസം വരെ.

ഏത് സാഹചര്യത്തിലാണ് ആനുകൂല്യങ്ങൾ നിർത്തലാക്കുന്നത്?

• ഗുണഭോക്താവിന് പുതിയ ജോലി ലഭിച്ചാൽ.
• ഗുണഭോക്താവ് യു.എ.ഇ. വിട്ടു പോവുകയാണെങ്കിൽ

നഷ്ടപരിഹാരം ക്ലെയിം ചെയ്യുന്നതിനുള്ള വ്യവസ്ഥകൾ എന്തൊക്കെയാണ്?

• 12 മാസത്തെ കുറഞ്ഞ സബ്‌സ്‌ക്രിപ്‌ഷൻ കാലയളവ്.
• പേയ്‌മെന്റുകൾ കൃത്യസമയത്ത് നടത്തിയിരിക്കണം.
• അവകാശി ജോലിയിൽ നിന്ന് രാജിവെക്കരുത്.
• അച്ചടക്ക കാരണങ്ങളാൽ വരിക്കാരനെ ജോലിയിൽ നിന്ന് പിരിച്ചുവിട്ടതാകരുത്.
• ക്ലെയിം അവസാനിപ്പിച്ച തീയതി മുതൽ 30 ദിവസത്തിനകം നഷ്ടപരിഹാരത്തിന് അപേക്ഷ സമർപ്പിക്കണം അല്ലെങ്കിൽ ജുഡീഷ്യറിയിൽ പരാമർശിച്ച തൊഴിൽ പരാതി തീർപ്പാക്കണം.