സ്വന്തം ലേഖകൻ
തിരുവനന്തപുരം • കേരള സർവകലാശാല വൈസ് ചാൻസലർ നിയമനവുമായി ബന്ധപ്പെട്ട് ഗവർണർക്ക് വഴങ്ങി വി.സി ഡോ.വി.പി മഹാദേവൻ പിള്ള. വി.സി നിയമന സെർച്ച് കമ്മിറ്റിയിലേക്ക് സെനറ്റ് പ്രതിനിധിയെ തെരഞ്ഞെടുക്കാൻ അടിയന്തര നടപടികൾ ആരംഭിച്ചതായി വൈസ് ചാൻസലർ, ഗവർണറുടെ സെക്രട്ടറിയെ ഇന്നലെ രേഖാമൂലം അറിയിച്ചു. എന്നാൽ സെനറ്റ് യോഗം വിളിച്ചു ചേർക്കുന്നത് സംബന്ധിച്ച നോട്ടിസ് അംഗങ്ങൾക്ക് ഉടൻ അയച്ചേക്കും. കഴിഞ്ഞ ജൂൺ 13 നാണ് സെർച്ച് കമ്മിറ്റിയിലേക്കുള്ള സെനറ്റിന്റെ പ്രതിനിധിയെ തെരഞ്ഞെടുത്ത് അറിയിക്കാൻ ഗവർണർ സർവകലാശാലയോട് ആവശ്യപ്പെട്ടത്. ആ ദിവസം മുതൽ ഇതുവരെയുള്ള പ്രതിനിധി തെരഞ്ഞെടുപ്പുമായി ബന്ധപ്പെട്ട എല്ലാ നടപടികളും ഈമാസം ഏഴിന് മുമ്പ് വിശദമായി അറിയിക്കാനാണ് വി.സിക്ക് കഴിഞ്ഞ ദിവസം ഗവർണറുടെ സെക്രട്ടറി കത്ത് നൽകിയത്. ഇതേതുടർന്നാണ് സെനറ്റ് വിളിച്ചു കൂട്ടാൻ അടിയന്തര നടപടികൾ സ്വീകരിക്കുമെന്ന് വൈസ് ചാൻസലർ ഗവർണറെ അറിയിച്ചത്. ജൂലൈ 15ന് ചേർന്ന സെനറ്റ് തെരഞ്ഞെടുത്ത പ്രതിനിധി പിൻവാങ്ങിയിരുന്നു. ഇതിനു പിന്നാലെ സർവകലാശാല സെനറ്റ് പ്രതിനിധിയെ ഒഴിച്ചിട്ട് ഗവർണർ രണ്ടംഗ സെർച്ച് കമ്മിറ്റി രൂപീകരിച്ചു. സെനറ്റ് വിളിച്ചു ചേർക്കാൻ മൂന്നു തവണ ആവശ്യപ്പെട്ട ശേഷമായിരുന്നു ഇത്. എന്നാൽ ഓഗസ്റ്റിൽ ചേർന്ന പ്രത്യേക സെനറ്റ് യോഗം, സെർച്ച് കമ്മിറ്റി ഏകപക്ഷീയമായി രൂപീകരിച്ച ഗവർണറുടെ നടപടിയെ അപലപിച്ചുകൊണ്ട് പ്രമേയം പാസാക്കിയിരുന്നു.

ഗവർണർ രണ്ടംഗ സെർച്ച് കമ്മിറ്റി രൂപീകരിച്ചതു ചട്ട വിരുദ്ധമാണെന്ന് വി.സിയും കുറ്റപ്പെടുത്തിയിരുന്നു. ഗവർണറുടെ നടപടി പിൻവലിക്കണമെന്ന സെനറ്റ് പ്രമേയത്തിനു മറുപടി ലഭിക്കാത്ത സാഹചര്യത്തിലാണ് സെനറ്റ് യോഗം വിളിക്കാത്തതെന്ന് വി.സി വിശദീകരിക്കുകയും ചെയ്തു. സർവകലാശാലയുടെ നിലപാടിൽ മാറ്റമില്ലെന്നു സിൻഡിക്കേറ്റ് യോഗത്തിനു ശേഷം വി.സി ഡോ.വി.പി.മഹാദേവൻ പിള്ള ഗവർണറെ രേഖാമൂലം അറിയിക്കുകയും ചെയ്തു. എന്നാൽ സെർച്ച് കമ്മിറ്റിയുടെ പ്രവർത്തനങ്ങളുമായി മുന്നോട്ടു പോകേണ്ടതിനാൽ ഗവർണറുടെ നിലപാടിലും മാറ്റമില്ലെന്ന് രാജ്ഭവനും മറുപടി നൽകി. ഒക്ടോബർ 24ന് വി.സി വിരമിക്കുന്നതിനാൽ പകരക്കാരനെ കണ്ടെത്താനുള്ള നടപടി രാജ്ഭവൻ നേരത്തെ തന്നെ ആരംഭിച്ചിരുന്നു.