മറ്റൊരു കേസില്‍ തിരക്കിലാണെന്ന് സി.ബി.ഐ; ലാവ്‌ലിന്‍ കേസ് വീണ്ടും മാറ്റി

കൊച്ചി: എസ്.എന്‍.സി ലാവ്‌ലിന്‍ കേസ് പരിഗണിക്കുന്നത് വീണ്ടും സുപ്രീം കോടതി വീണ്ടും മാറ്റി. മറ്റൊരു കേസില്‍ തിരക്കിലാണെന്ന് ചൂണ്ടിക്കാട്ടി സമയം നീട്ടി നല്‍കാന്‍ സി.ബി.ഐ ആവശ്യപ്പെട്ടതിനെ തുടര്‍ന്നാണ് കോടതിയുടെ നടപടി. ജസ്റ്റിസ് സൂര്യകാന്ത്, ജസ്റ്റിസ് ദീപാങ്കര്‍ ദത്ത എന്നിവരടങ്ങിയ ബെഞ്ചാണ് കേസ് പരിഗണിച്ചത്. 2017 ല്‍ സുപ്രീം കോടതിയിലെത്തിയ കേസ് ആറ് വര്‍ഷത്തിനിടെ 36 തവണയാണ് കോടതി പരിഗണിച്ചത്. കേസ് നവംബര്‍ ആറിന് വീണ്ടും പരിഗണിക്കും.

മുഖ്യമന്ത്രി പിണറായി വിജയന്‍, ഊര്‍ജ വകുപ്പ് സെക്രട്ടറി കെ. മോഹന ചന്ദ്രന്‍, ജോയന്റ് സെക്രട്ടറി എ. ഫ്രാന്‍സിസ് എന്നിവരെ കുറ്റവിമുക്തരാക്കിയ 2017ലെ കേരള ഹൈക്കോടതി വിധിക്കെതിരെ സി.ബി.ഐ സമര്‍പ്പിച്ച ഹരജിയാണ് ഇപ്പോള്‍ സുപ്രീം കോടതിയുടെ പരിഗണനയിലുള്ളത്. അഡീഷണല്‍ സോളിസിറ്റര്‍ ജനറല്‍ എസ്.വി രാജുവാണ് കേസില്‍ സി.ബി.ഐക്ക് വേണ്ടി ഹാജരായത്.