വാഫി വഫിയ്യ: സമസ്ത ഉചിതമായ നിലപാടുകള്‍ കൈ കൊണ്ടു; ജിഫ്‌രി തങ്ങള്‍

പട്ടിക്കാട് (മലപ്പുറം): വാഫി വഫിയ്യ വിഷയത്തില്‍ സമസ്ത ഉചിതമായ നിലപാടുകളാണ് കൈ കൊണ്ടതെന്നും മറിച്ചുള്ള പ്രചരണങ്ങള്‍ ശരിയല്ലെന്നും സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പറഞ്ഞു. സമസ്ത മലപ്പുറം ജില്ലാ ഉലമാ സമ്മേളനത്തിന്റെ സമാപനം സംഗമത്തില്‍ അധ്യക്ഷത വഹിച്ചു സംസാരിക്കുകയായിരുന്നു തങ്ങള്‍. സമസ്ത മഹാരഥന്‍മാര്‍ സ്ഥാപിച്ച സംഘടനയാണ്. വ്യക്തമായ കാഴ്ച്ചപാടോടെയും കൂട്ടായ തീരുമാനങ്ങളോടെയുമാണ് സമസ്ത മുന്നോട്ടു പോവുന്നത്.

വിമര്‍ശനങ്ങള്‍ സ്വാഭാവികമാണ്. വിമര്‍ശനങ്ങളെ ഭയക്കുന്നില്ലെന്നും സമസ്ത പ്രൗഢിയോടെ ഇവിടെ കാലാന്ത്യം വരെ നിലനില്‍ക്കുക തന്നെ ചെയ്യുമെന്നും ജിഫ്‌രി തങ്ങള്‍ പറഞ്ഞു. സമസ്ത ജനറല്‍ സെക്രട്ടറി പ്രൊഫ.കെ. ആലികുട്ടി മുസ്ലിയാര്‍ ഉദ്ഘാടനം ചെയ്തു. സമസ്ത കേന്ദ്ര മുശാവറ അംഗം ഹൈദര്‍ ഫൈസി പനങ്ങാങ്ങര മുഖ്യ പ്രഭാഷണം നടത്തി.