കണ്ണൂര്‍: അഴീക്കല്‍ ഫിഷറീസ് ഹയര്‍സെക്കന്‍ഡറി സ്‌കൂള്‍ ഹോസ്റ്റല്‍ വാര്‍ഡന്‍ വിദ്യാര്‍ഥിയെ മര്‍ദിച്ചവശനാക്കിയതായി പരാതി. കാസര്‍കോട് നെല്ലിക്കുന്ന് സ്വദേശിയും സ്‌കൂളിലെ 10ാംതരം വിദ്യാര്‍ഥിയുമായ ജയസൂര്യ(15)യാണ് മര്‍ദനത്തിനിരയായത്. സംഭവത്തില്‍ വാര്‍ഡന്‍ സലീഷിനെതിരേ വളപട്ടണം പൊലിസ് കേസെടുത്തു. അവശനിലയിലായ കുട്ടിയെ കഴിഞ്ഞദിവസം രാത്രി രണ്ടോടെ ബന്ധുക്കളെത്തി ജില്ലാ ആശുപത്രിയില്‍ പ്രവേശിപ്പിക്കുകയായിരുന്നു. വാര്‍ഡനെതിരേ നടപടി ആവശ്യപ്പെട്ട് പൊലിസ് മേധാവിക്കും ഡി.ഡി.ഇക്കും ബന്ധുക്കള്‍ പരാതി നല്‍കി. അധ്യാപകനെ പൊലിസും സ്‌കൂള്‍ അധികൃതരും സംരക്ഷിക്കുന്നതായി ആരോപിച്ച് അഴീക്കോട് യൂത്ത് കോണ്‍ഗ്രസ് പ്രവര്‍ത്തകര്‍ സ്‌കൂളിലെത്തി പ്രതിഷേധിച്ചു.