തിരുവനന്തപുരം • സംസ്ഥാന സമ്മേളനത്തിൽ സർക്കാരിനെതിരായ വിമർശനങ്ങളുയർന്നത് പരസ്യമായി സമ്മതിച്ച് സി.പി.ഐ നേതാക്കൾ. കുറച്ചുകൂടി മെച്ചപ്പെടാനുണ്ടെന്നും എല്ലാവർക്കും എല്ലാകാര്യങ്ങളിലും തൃപ്തിയില്ലെന്നും അസി.സെക്രട്ടറി കെ.പ്രകാശ്ബാബു പറഞ്ഞു. പാർട്ടിയിലെ പ്രായപരിധി സംസ്ഥാന കൗൺസിൽ അംഗീകരിച്ചതാണെന്നും അതു നടപ്പാക്കുമെന്നും പ്രകാശ്ബാബു പറഞ്ഞു. പ്രായപരിധി ദേശീയ കൗൺസിലിന്റെ മാർഗ നിർദേശം മാത്രമാണെങ്കിലും ഓരോ സംസ്ഥാനങ്ങൾക്കും നടപ്പാക്കണമോ എന്ന് തീരുമാനിക്കാം. ഇതനുസരിച്ച് നടപ്പാക്കാൻ സംസ്ഥാന കൗൺസിൽ നേരത്തെ തീരുമാനിച്ചതാണെന്നും എതിർപ്പുകൾക്ക് പ്രസക്തിയില്ലെന്നും പ്രകാശ്ബാബു പറഞ്ഞു. പാർട്ടി അച്ചടക്കം ലംഘിച്ച ഇസ്മായിലിനെതിരേയും, ദിവാകരനെയുമുള്ള നടപടി പുതിയ സംസ്ഥാന കൗൺസിൽ തീരുമാനിക്കുമെന്നും പ്രകാശ് ബാബു പറഞ്ഞു.