പയ്യന്നൂര്‍: വിദ്യാര്‍ഥികളുമായി പോവുകയായിരുന്ന ഓട്ടോടാക്‌സി വയലിലേക്ക് മറിഞ്ഞു. ഇന്നലെ രാവിലെ എട്ടോടെ കിഴക്കേ കണ്ടങ്കാളിയിലായിരുന്നു അപകടം. മത്സ്യവില്‍പനക്കാരന്റെ വാഹനത്തിനു സൈഡ് കൊടുക്കുന്നതിനിടെ റോഡിന്റെ അരിക് ഇടിഞ്ഞ് വാഹനം വയലിലേക്കു മറിയുകയായിരുന്നു. ആര്‍ക്കും പരുക്കില്ല. സംഭവം നടന്നയുടന്‍ ഓടിയെത്തിയ നാട്ടുകാര്‍ വാഹനത്തില്‍ നിന്നു കുട്ടികളെ പുറത്തെത്തിച്ചു. സംഭവസമയം ആറു കുട്ടികളാണു വാഹനത്തില്‍ ഉണ്ടായിരുന്നത്. വയലില്‍ വെള്ളമില്ലാത്തതും കൂടുതല്‍ അപകടങ്ങള്‍ ഒഴിവാകാന്‍ കാരണമായി. വയലിനു മധ്യഭാഗത്തായി ഈ ഭാഗത്തുള്ള റോഡുകള്‍ക്ക് ആവശ്യമായ വീതിയില്ലെന്നു നേരത്തെ ആരോപണമുണ്ട്. റോഡിന്റെ അരികിന് കെട്ടുറപ്പില്ലാത്തതാണ് ഇടിഞ്ഞുവീഴാന്‍ കാരണമായത്.