സ്റ്റോക്ക്‌ഹോം • ഈ വർഷത്തെ വൈദ്യശാസ്ത്ര നൊബേൽ സ്വീഡിഷ് ശാസ്ത്രജ്ഞൻ സ്വാന്റെ പേബൂവിന്റെ കൈകളിലെത്തുന്നത് ഒരു ദശകത്തിലധികം നീണ്ട ഗവേഷണത്തിനൊടുവിൽ. പുരസ്‌കാരലബ്ധിക്ക് ആധാരമായ മനുഷ്യന്റെ ജനിതകഘടനയും പരിണാമവും സംബന്ധിച്ച അന്വേഷണങ്ങൾക്ക് പേബൂ തുടക്കമിടുന്നത് 2010ലാണ്. ആദിമ മനുഷ്യവിഭാഗമായ നിയാണ്ടർത്താലിന്റെ ജനിതകഘടനാ പഠനത്തിനാണ് അന്ന് തുടക്കമിട്ടത്. 2013ൽ ഇതുസംബന്ധിച്ച റിപ്പോർട്ടും പ്രസിദ്ധീകരിച്ചു. ഗവേഷണത്തിന്റെ ഭാഗമായി ഡെനിസോവൻ്റെ (ആദിമ മനുഷ്യവർഗം) ജനിതകഘടനയെ പേബൂ പഠനത്തിന് വിധേയമാക്കിയിരുന്നു. ഇവരുടെ അഞ്ചുശതമാനം ജീനുകൾ ആധുനിക മനുഷ്യരിലേക്ക് കൈമാറ്റംചെയ്യപ്പെട്ടതായി അദ്ദേഹം കണ്ടെത്തി. പൂർവ മനുഷ്യബന്ധുക്കളായ ഹൊമിനിൻസിൽനിന്ന് ഇത്തരത്തിൽ ജീനുകൾ പുതിയ തലമുറയിലേക്ക് വന്നുചേരുന്നുവെന്നും ഇവ മനുഷ്യശരീരത്തിൽ നേരിട്ട് സ്വാധീനം ചെലുത്തുന്നുവെന്നും പേബൂവിന്റെ പഠനങ്ങൾ സാക്ഷ്യപ്പെടുത്തുന്നു.

1955 ഏപ്രിൽ 20ന് സ്വീഡനിലെ സ്റ്റോക്ക്‌ഹോമിലാണ് പേബൂവിന്റെ ജനനം. ജനിതകഘടന സംബന്ധിച്ച ഗവേഷണങ്ങൾക്ക് നൊബേലിന് പുറമെ നിരവധി പുരസ്‌കാരങ്ങൾ അദ്ദേഹത്തിന് ലഭിച്ചിട്ടുണ്ട്. പ്രിൻസസ് ഓഫ് അസ്തൂരിയാസ് അവാർഡ് (2018), ബ്രേക്ക്ത്രൂ സമ്മാനം (2015), ഗ്രൂബർ പുരസ്‌കാരം (2013) എന്നിവ ഇതിൽപ്പെടും. 'നിയാണ്ടർത്താൽ മാൻ: ഇൻ സെർച്ച് ഓഫ് ലോസ്റ്റ് ജെനംസ് ആണ് അദ്ദേഹത്തിന്റെ പ്രധാന കൃതി.