തൃശൂരില്‍ മകന്റെ കുടുംബത്തെ പെട്രോള്‍ ഒഴിച്ച് തീകൊളുത്തി പിതാവ്

തൃശൂര്‍: തൃശൂര്‍ ചിറക്കേക്കോട് മകന്റെ കുടുംബത്തെ പെട്രോള്‍ ഒഴിച്ച് തീ കൊളുത്തി പിതാവ്. ചിറക്കേക്കോട് സ്വദേശി ജോജി (38), ഭാര്യ ലിജി (32), മകന്‍ ടെണ്ടുല്‍ക്കര്‍ (12) എന്നിവര്‍ക്കാണ് പൊള്ളലേറ്റത്. പൊള്ളലേറ്റ മൂന്നു പേരെയും കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ജോജിയുടെയും ലിജിയുടെയും നില ഗുരുതരമാണ്.

കുടുംബ വഴക്കിനെ തുടര്‍ന്നാണ് ജോജിയുടെ പിതാവ് ജോണ്‍സന്‍ (58) ഈ കടുംകൈ ചെയ്തതെന്നാണ് പൊലിസ് പറയുന്നത്. ഇന്നലെ അര്‍ധരാത്രിയായിരുന്നു സംഭവം. തീ കൊളുത്തിയ ശേഷം വിഷം കഴിച്ച് ആത്മഹത്യയ്ക്ക് ശ്രമിച്ച ജോണ്‍സനെയും ആശുപത്രിയില്‍ പ്രവേശിപ്പിച്ചിരിക്കുകയാണ്. ഭാര്യയെ മറ്റൊരു മുറിയില്‍ പൂട്ടിയിട്ട ശേഷമാണ് ജോണ്‍സന്‍ മകനെയും മരുമകളെയും കൊച്ചുമകനെയും തീ കൊളുത്തിയത്. സെക്യൂരിറ്റി ജീവനക്കാരനാണ് ജോണ്‍സന്‍. ലോറി ഡ്രൈവറാണ് മകന്‍ ജോജി.