പാലക്കാട് • വിട്ടുവീഴ്ചയില്ലാതെ നടത്തുന്ന ജനകീയ സമരങ്ങൾക്ക് മുന്നിൽ കോർപ്പറേറ്റുകളും, അവർക്ക് സഹായം ചെയ്യുന്ന ഭരണകൂടങ്ങളും മുട്ടുകുത്തുന്ന ചരിത്രമാണ് നമ്മൾ കാണുന്നതെന്ന് സാമൂഹിക, പരിസ്ഥിതി പ്രവർത്തക മേധാപട്ക്കർ. പ്ലാച്ചിമടയിൽ രണ്ടാംഘട്ടമായി ആരംഭിച്ച സത്യഗ്രഹസമരത്തിന്റെ അൻപതാം ദിവസത്തെ ഐക്യദാർഢ്യസമ്മേളനം ഉദ്ഘാടനം ചെയ്യുകയായിരുന്നു അവർ.

കർഷകർ നടത്തിയ സമരത്തിന് മുന്നിൽ കേന്ദ്രസർക്കാരിന് മുട്ടു കുത്തേണ്ടി വന്നത് അത് ജനകീയസമരമായതുകൊണ്ടാണ്. പ്ലാച്ചിമടയിൽ ഇരുപത് വർഷമായി തുടരുന്ന സമരത്തിനു മുന്നിൽ കേരളസർക്കാരിനു മുട്ടുകുത്തേണ്ടി വരും. നിയമസഭയിൽ ഐക്യകണേഠന പാസാക്കിയ നഷ്ടപരിഹാര ട്രൈബ്യൂണൽ ബിൽ പാസാക്കി പ്ലാച്ചിമട ജനതക്കു നഷ്ടപരിഹാരം ലഭ്യമാക്കണം, കൊക്കക്കോള കമ്പനിയെ പ്രോസിക്യൂട്ട് ചെയ്യുംവരെ സമരം നടത്തണം.ഇപ്പോൾ ഭരിക്കുന്ന കക്ഷികളെ നേർവഴിക്കു നടത്താൻ പ്രതിപക്ഷമില്ല. അവരൊക്കെ ഒന്നിച്ചാണ്, യാഥാർത്ഥ പ്രതിപക്ഷം ജനശക്തിയാണെന്നും അവർ പറഞ്ഞു. കേന്ദ്രം ഈയിടെ പാസാക്കിയ തൊഴിൽനിയമങ്ങൾ തൊഴിലാളികളുടെ അവകാശം ഇല്ലാതാക്കുന്നു. നമ്മുടെ രാഷ്ട്രപതി സഹോദരി ആദിവാസിയാണ്. അവർക്ക് പ്ലാച്ചിമടയിലെ ആദിവാസികൾ നടത്തുന്ന സമരം കണ്ടില്ലെന്ന് നടിക്കാൻ കഴിയില്ലെന്നും, സംസ്ഥാന സർക്കാർ ഈ വിഷയത്തിൽ അടിയന്തരമായി ഇടപെട്ട് ട്രൈബ്യൂണൽ പ്രാവർത്തികമാക്കണമെന്നും അവർ ആവശ്യപ്പെട്ടു. ഒഡീസ നിയാമഗിരിയിലെ വേദാന്തയുടെ ഖനനത്തിനെതിരായി സമരം നടത്തിയ ഡോ. പ്രഫുല്ല സാമന്തറ മുഖ്യപ്രഭാഷണം നടത്തി. യോഗത്തിൽ പ്ലാച്ചിമട സമരസമിതി ചെയർമാൻ വിളയോടി വേണുഗോപാൽ അധ്യക്ഷനായി.