കോട്ടയം• കാഞ്ഞിരപ്പള്ളിയിലെ കടയിൽ നിന്ന് മാമ്പഴം മോഷ്ടിച്ച പൊലിസുകാരനെ ഇടുക്കി എസ്.പി അന്വേഷണ വിധേയമായി സസ്പെൻഡ് ചെയ്തു. ഇടുക്കി എ.ആർ കാംപിലെ സിവിൽ പൊലിസ് ഓഫിസർ മുണ്ടക്കയം വണ്ടൻപതാൽ സ്വദേശി ഷിഹാബിനെയാണ് സർവിസിൽ നിന്ന് സസ്പെൻഡ് ചെയ്തത്. സംഭവദിവസം കോട്ടയം മെഡിക്കൽ കോളജിലായിരുന്നു ഷിഹാബിന് ഡ്യൂട്ടി. രാത്രി ഡ്യൂട്ടി കഴിഞ്ഞു കാഞ്ഞിരപ്പള്ളി പാറത്തോടു ഭാഗത്തുള്ള വീട്ടിലേക്കു വരും വഴിയാണ് മോഷണം നടത്തിയത്. കടയുടെ മുൻപിൽ കൊട്ടയിൽ മുടി കെട്ടിവച്ചിരിക്കുകയായിരുന്നു മാമ്പഴം. മോഷ്ടിച്ച മാമ്പഴം സ്കൂട്ടറിൻ്റെ സീറ്റിനടിയിലുള്ള സ്‌റ്റോറേജിലാക്കി കടക്കുകയായിരുന്നു. പിറ്റേദിവസം രാവിലെ കടയുടമ നാസർ കട തുറക്കാൻ വന്നപ്പോഴാണ് മാമ്പഴം മോഷണം പോയ വിവരം മനസിലായത്. 10 കിലോയോളം മാമ്പഴം കാണാതായിട്ടുണ്ടെന്നാണ് നാസറിന്റെ പരാതി. കടയുടെ മുൻപിൽ സ്ഥാപിച്ചിരുന്ന സി.സി.ടി.വി ദൃശ്യങ്ങളിൽ നിന്ന് ലഭിച്ച സ്കൂട്ടറിൻ്റെ നമ്പർ കേന്ദ്രീകരിച്ചു നടത്തിയ അന്വേഷണമാണ് ഷിഹാബിലേക്കെത്തിയത്. ഇയാൾ ഒളിവിലാണ്.