പി.കെ.പി ഉസ്താദ് സ്മാരക അവാര്‍ഡ് അസ്‌ലം അസ്ഹരി പൊയ്തുംകടവിന്‌

കണ്ണൂര്‍: അജ്മാന്‍ കണ്ണൂര്‍ ജില്ലാ എസ്.കെ.എസ്.എസ്.എഫ് രണ്ടാമത് പി.കെ.പി ഉസ്താദ് സ്മാരക അവാര്‍ഡിന് അസ്‌ലം അസ്ഹരി പൊയ്തും കടവ് അര്‍ഹനായി. പ്രബോധന മേഖലയില്‍ തിളക്കമാര്‍ന്ന പ്രവര്‍ത്തനങ്ങള്‍ കാഴ്ചവെക്കുന്നവര്‍ക്കാണ് അജ്മാന്‍ എസ് .കെ .എസ് .എസ് .എഫ് അവാര്‍ഡ് ഏര്‍പ്പെടുത്തിയത്. പ്രഥമ അവാര്‍ഡിന് യുഎ.ഇ എസ്.കെ.എസ്.എസ്.എഫ് പ്രസിഡന്റ് സയ്യിദ് ശുഹൈബ് തങ്ങളാണ് അര്‍ഹനായത്.

പ്രഭാഷകനും എഴുത്തുകാരനുമായ അസ്ലം അസ്ഹരി പ്രബോധന രംഗത്തും സംഘടനാ രംഗത്തും മികച്ച പ്രവര്‍ത്തനങ്ങളാണ് കാഴ്ചവെക്കുന്നത്. നിലവില്‍ കണ്ണൂര്‍ ജില്ല എസ് കെ എസ് എസ് എഫ് പ്രസിഡന്റും കണ്ണൂര്‍ ഇസ്ലാമിക് അക്കാദമിയുടെ പ്രിന്‍സിപ്പളും ആണ്. തിങ്കളാഴ്ച പാപ്പിനിശ്ശേരിയില്‍ വെച്ച് നടക്കുന്ന ശൈഖുനാ പി കെ പി ഉസ്താദ് ഉറൂസ് മുബാറക്കിന്റെ സമാപന വേദിയില്‍ സമസ്ത പ്രസിഡണ്ട് സൈദുല്‍ ഉലമ സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍ കാശ് അവാര്‍ഡും മൊമന്റോയും സമ്മാനിക്കും.

എ കെ അബ്ദുല്‍ ബാഖവി ചെയര്‍മാനും അമീര്‍ ഹുദവി, റംഷാദ് ചാലാട്, ഷഫീര്‍ കാക്കയങ്ങാട്, മൂഹിബ്ബ് പാപ്പിനിശ്ശേരി എന്നിവര്‍ അംഗങ്ങളായ ജൂറി കമ്മിറ്റിയാണ് അവാര്‍ഡ് ജേതാവിനെ തിരഞ്ഞെടുത്തത്.