കവരത്തി: പ്രഫുല്‍ ഖോഡ പട്ടേല്‍ ഇന്ന് സേവ് ലക്ഷദ്വീപ് ഫോറവുമായി ചര്‍ച്ച നടത്തും. വൈകീട്ട് കവരത്തിയിലെ അഡ്മിനിസ്‌ട്രേറ്റിവ് ഓഫിസിലാണ് ചര്‍ച്ച.

ഒരാഴ്ചത്തെ സന്ദര്‍ശനത്തിനാണ് ലക്ഷദ്വീപ് അഡ്മിനിസ്‌ട്രേറ്റര്‍ ദ്വീപിലെത്തുന്നത്. കഴിഞ്ഞ ദിവസം കൊച്ചിയില്‍ തങ്ങിയ പട്ടേല്‍ ചൊവ്വാഴ്ച രാവിലെ ഹെലികോപ്റ്ററില്‍ ദ്വീപിലേക്കു തിരിക്കുമെന്നാണ് റിപ്പോര്‍ട്ട്. നിലവില്‍ നടപ്പാക്കുന്ന ഭരണപരിഷ്‌കാരങ്ങളുടെ പുരോഗതി വിലയിരുത്താനാണ് സന്ദര്‍ശനം.

പ്രതിഷേധ സാധ്യതകള്‍ നിലനില്‍ക്കുന്നതിനാല്‍ വൈ കാറ്റഗറി സുരക്ഷയാണു പ്രഫുല്‍ പട്ടേലിന് അനുവദിച്ചിട്ടുള്ളത്. നേരത്തേ വ്യോമസേനയുടെ പ്രത്യേക വിമാനത്തിലായിരുന്നു ദ്വീപ് സന്ദര്‍ശനം. വന്‍ സാമ്പത്തിക ധൂര്‍ത്തെന്ന തരത്തില്‍ വാര്‍ത്ത വന്നതോടെ പ്രത്യേക വിമാനയാത്ര ഇത്തവണ ഒഴിവാക്കുകയായിരുന്നു.