പൊന്നാനി: സാമ്പത്തിക പരാധീനതകള്‍ക്കുമേല്‍ തുഴയെറിഞ് ബിയ്യം കായലില്‍ ജലോത്സവത്തിനായി വള്ളങ്ങളൊരുങ്ങുന്നു. ഓണാഘോഷങ്ങളുടെ ഭാഗമായി അവിട്ടം നാളില്‍ നടക്കുന്ന ബിയ്യം കായല്‍ വള്ളംകളി മത്സരത്തിനുള്ള പരിശീലനം തുടങ്ങി. ലക്ഷത്തിലേറെ ചെലവുവരുന്ന വിനോദമായിട്ടും പാരമ്പര്യത്തെ നിലനിര്‍ത്താനുള്ള തീവ്രപരിശ്രമത്തിന്റെ ഭാഗമായാണ് ഇത്തവണയും ബിയ്യം കായലില്‍ തുഴയെറിയാനായി വള്ളങ്ങള്‍ സജ്ജമാക്കുന്നത് .
കഴിഞ്ഞ രണ്ടുതവണയും ജലാത്സവം നടത്തിപ്പ് തര്‍ക്കത്തിലും അടിപിടിയിലും കലാശിച്ചതിനാല്‍ ഇത്തവണ സംഘാടനത്തില്‍ മാറ്റങ്ങള്‍ വേണമെന്ന് വിവിധ കോണുകളില്‍ നിന്ന് ആവശ്യമുയര്‍ന്നിട്ടുണ്ട്. സംഘാടനത്തിലും നടത്തിപ്പിലും ഈ വര്‍ഷം മാറ്റം കൊണ്ടുവരുമെന്ന് നേരത്തേ തഹസില്‍ദാര്‍ സൂചന നല്‍കിയിരുന്നു. മലബാറിലെ ഏറ്റവും വലിയ ജലോത്സവങ്ങളിലൊന്നായ ബിയ്യം കായല്‍ വള്ളം കളിയോട് അധികൃതര്‍ തുടരുന്ന അവഗണനയെ വകഞ്ഞുമാറ്റി നാട്ടുകാരുടെ പരിശ്രമഫലമായാണ് ഇത്തവണയും മത്സരത്തിനുള്ള ഒരുക്കങ്ങള്‍ ആരംഭിച്ചിരിക്കുന്നത് .
പരിശീലനകാലങ്ങളില്‍ ഒരു ലക്ഷത്തിലേറെ രൂപ ചെലവ് ഓരോ ക്ലബുകള്‍ക്കും അഭിമുഖീകരിക്കേണ്ടിവരുന്നുണ്ട് . ഇതിന് സമ്മാനതുകയായി ലഭിക്കുന്നത് 25000 രൂപ മാത്രമാണ്. പ്രോത്സാഹന സമ്മാനമായി 20000 രൂപയും. വന്‍ സാമ്പത്തികബാധ്യത വരുത്തിവെക്കുന്ന മത്സരമായിരുന്നിട്ടും നാട്ടുകാരുടെ ആവേശം കണക്കിലെടുത്ത് മാത്രമാണ് ക്ലബുകള്‍ ഓരോവര്‍ഷവും വള്ളം കളി മത്സരത്തിനായി ഒരുങ്ങുന്നത് . ആലപ്പുഴയില്‍ നിന്ന് ദിവസക്കൂലി ഇനത്തില്‍ 1500 രൂപ നല്‍കിയാണ് തൊഴിലാളികളെ കൊണ്ടുവരുന്നത്. ഒരുവള്ളം പണിയെടുക്കാന്‍ എട്ടു തൊഴിലാളികള്‍ വേണ്ടി വരും. ഇവരുടെ താമസ സൗകര്യവും ഭക്ഷണവും ക്ലബുകാര്‍ തന്നെ ഒരുക്കിക്കൊടുക്കണം. കേരളത്തിലെ തന്നെ മികച്ച വള്ളംകളി വേദിയായിരുന്ന ബിയ്യം കായല്‍ വള്ളം കളി ടൂറിസം വകുപ്പിന്റെ അവഗണന മൂലമാണ് ശോഷിച്ചുവരുന്ന അവസ്ഥയിലെത്തിയത്.