ന്യൂഡല്‍ഹി: കൊവിഡിനെതിരായ കേരളത്തിന്റെ പോരാട്ടത്തെ വിമര്‍ശിച്ച് കേന്ദ്ര ആരോഗ്യമന്ത്രാലയം. ഇളവുകള്‍ നല്‍കുന്നതില്‍ സംസ്ഥാനം വലിയ ജാഗ്രത കാണിക്കണമെന്നും സംസ്ഥാന ആരോഗ്യസെക്രട്ടറിക്ക് കേന്ദ്ര ആരോഗ്യമന്ത്രാലയ സെക്രട്ടറി അയച്ച കത്തില്‍ പറയുന്നു.

രാജ്യത്തെ പ്രതിദിന കേസുകളുടെ പകുതിയും കേരളത്തില്‍നിന്നായതിനുപിന്നാലെയാണ് കേന്ദ്രത്തിന്റെ നടപടി.
ആഘോഷപരിപാടികളില്‍ ഇളവ് അനുവദിച്ചത് തീവ്രവ്യാപനത്തിനിടയാക്കിയെന്നാണ് കേന്ദ്രത്തിന്റെ ആരോപണം. ജൂലൈ അഞ്ചു മുതല്‍ ഒന്‍പതുവരെ കേരളം സന്ദര്‍ശിച്ച വിദഗ്ധ സംഘത്തിന്റെ റിപ്പോര്‍ട്ടിന്റെ അടിസ്ഥാനത്തിലാണ് കേന്ദ്രം കത്തയച്ചത്.

ഇപ്പോഴത്തെ സ്ഥിതി നിരീക്ഷിക്കാന്‍ കേന്ദ്രം ഒരുസംഘത്തെക്കൂടി ഉടന്‍ അയക്കുമെന്നും കത്തില്‍ അറിയിച്ചു.
ഒരു മാസത്തെ കണക്കുകള്‍ പരിശോധിച്ചാല്‍ കേരളത്തില്‍ വീണ്ടും കേസുകള്‍ കൂടിവരികയാണെന്നത് ആശങ്കയുണ്ടാക്കുന്നു. കേരളം കൂടുതല്‍ കാര്യക്ഷമമായി പ്രവര്‍ത്തിക്കേണ്ട സമയം അതിക്രമിച്ചിരിക്കുന്നു. സജീവ കേസുകളില്‍ 95 ശതമാനവും വീടുകളിലാണ് ഐസൊലേഷനില്‍ കഴിയുന്നത്. ഇതിനുള്ള മാനദണ്ഡം കൃത്യമായി പാലിക്കണം.
കോട്ടയം, എറണാകുളം, മലപ്പുറം ജില്ലകളില്‍ സ്ഥിരീകരണ നിരക്ക് വളരെ കൂടുതലാണ്. സംസ്ഥാനത്ത് വാക്‌സിനേഷന്‍ കൂടുതല്‍ വേഗത്തിലാക്കേണ്ടതുണ്ടെന്നും മന്ത്രാലയം ചൂണ്ടിക്കാട്ടി.