മലയാളികളടക്കമുള്ള പ്രവാസികൾക്ക് തിരിച്ചടി; സലാം എയർ ഇന്ത്യയിലേക്കുള്ള സർവീസ് നിർത്തുന്നു

മസ്കത്ത്​: മലയാളികളടക്കമുള്ള സാധാരണക്കാരുടെ ആശ്രയമായ സലാം എയർ ഇന്ത്യയിലേക്കുള്ള സർവീസ് നിർത്തുന്നു. ഒക്​ടോബർ ഒന്ന്​ മുതൽ ഇന്ത്യയിലേക്കുള്ള വിമാനങ്ങൾ ഉണ്ടാകില്ലെന്ന് ട്രാവൽ ഏജൻസികൾക്ക്​ അയച്ച സർക്കുലറിൽ കമ്പനി അറിയിച്ചു. കേരളത്തിലെ രണ്ട് വിമാനത്താവളങ്ങളിലേക്ക് ഉൾപ്പെടെ സർവീസ് നടത്തിയിരുന്ന ഒമാന്‍റെ ബജറ്റ്​ വിമാനമാണ് സലാം എയർ.

ഈ മാസം അവസാനം വരെയാണ് വിമാനം നിലവിൽ സർവീസ് നടത്തുക. ഒക്​ടോബർ ഒന്ന്​ മുതലുള്ള ടിക്കറ്റ് ബുക്കിങ് ഓപ്‌ഷൻ വെബ്‌സൈറ്റിൽ നിന്ന് നീക്കിയിട്ടുണ്ട്. മുൻകൂട്ടി ബുക്ക് ചെയ്തവർക്ക് പണം തിരിച്ചു നൽകുമെന്ന് കമ്പനി അറിയിച്ചു. റീ ഫണ്ടിനെ കുറിച്ച്​ സംശയം ഉണ്ടെങ്കിൽ ബന്ധപ്പെടാമെന്ന് കമ്പനി അറിയിച്ചു. റിസർവേഷൻ ചെയ്ത എല്ലാ യാത്രക്കാർക്കും പൂർണമായും റീഫണ്ട് നൽകും.

നിലവിൽ സലാം എയർ ഇന്ത്യയിലെ കോഴിക്കോട്​, തിരുവനന്തപുരം, ജയ്പൂർ, ലഖ്​നൗ എന്നീ നഗരങ്ങളിലേക്കാണ്​ സർവീസ് നടത്തുന്നത്. സലാലയിൽ നിന്ന് കോഴിക്കോട്ടേക്കുള്ള വിമാനം നിരവധി പ്രവാസികളുടെ ആശ്രമായിരുന്നു.

ഇന്ത്യയിലേക്ക്​ വിമാനങ്ങൾ അനുവദിക്കുന്നതിലുള്ള പരിമിതി മൂലമാണ് സർവിസുകൾ നിർത്തുന്നതെന്നാണ് സലാം എയറിന്റെ വിശദീകരണം. എന്നാൽ സർവീസ് എത്രകാലത്തേക്കാണ് നിർത്തുന്നത് എന്നോ, വീണ്ടും പുനരാരംഭിക്കുമോ എന്നീ കാര്യങ്ങളിൽ കമ്പനി പ്രതികരിച്ചിട്ടില്ല.