കോഴിക്കോട്: ഭിന്നശേഷിക്കാര്‍ക്ക് വേണ്ടി മുസ്‌ലിം സംവരണം അട്ടിമറിക്കുന്ന സര്‍ക്കാര്‍ ഉത്തരവ് റദ്ദാക്കണമെന്ന് എസ്.കെ.എസ്.എസ്.എഫ് സംസ്ഥാന ജന. സെക്രട്ടറി സത്താര്‍ പന്തലൂര്‍. സംസ്ഥാനത്ത് നിയമനങ്ങളില്‍ ഭിന്നശേഷിക്കാര്‍ക്ക് സംവരണം നല്‍കാന്‍ മുസ്‌ലിം ടേണില്‍ നിന്ന് തട്ടിയെടുത്തത് കടുത്ത അനീതിയാണ്. ഉദ്യോഗ മേഖലയില്‍ ഏറെ പ്രാതിനിധ്യക്കുറവ് അനുഭവപ്പെടുന്ന മുസ്‌ലിംകളുടെ അവകാശം തന്നെ തട്ടിയെടുക്കുന്നത് ഗൂഢാലോചനയുടെ ഭാഗമാണ്. ഇക്കാര്യത്തില്‍ പി.എസ്.സി വിശദീകരണം നല്‍കണം. അഖിലേന്ത്യാ തലത്തില്‍ മെഡിക്കല്‍ സീറ്റില്‍  പിന്നോക്ക സംവരണം വര്‍ധിപ്പിച്ചിരിക്കുകയാണ്. ഈ സാഹചര്യത്തില്‍ സംസ്ഥാനത്തും ജനസംഖ്യാനുപാതികമായി പിന്നോക്ക സംവരണം വര്‍ധിപ്പിക്കണം. കേരളത്തില്‍ 70 ശതമാനമുള്ള പിന്നോക്ക വിഭാഗത്തിന് ഒന്‍പതും 20 ശതമാനത്തിന് തഴെയുള്ള മുന്നാക്ക വിഭാഗത്തിലുള്ള പിന്നോക്കക്കാര്‍ക്ക് 10 ശതമാനവുമാണ് നല്‍കുന്നത്. ഇത്തരം വിവേചനങ്ങള്‍ ഒരു പുരോഗമന സമൂഹത്തിന് യോജിച്ചതല്ലെന്നും അദ്ദേഹം പറഞ്ഞു.