യുവതിയും മക്കളും ഗുരുവായൂരില്‍; വയനാട്ടില്‍ നിന്ന് കാണാതായ കുടുംബത്തെ കണ്ടെത്തി

ഗുരുവായൂര്‍: വയനാട് കമ്പളക്കാട് നിന്ന് കാണാതായ യുവതിയെയും അഞ്ച് മക്കളെയും കണ്ടെത്തി. കമ്പളക്കാട് കൂടോത്തുമ്മലില്‍ താമസിക്കുന്ന കോഴിക്കോട് സ്വദേശികളായി കുടുംബത്തെ ഗുരുവായൂര്‍ പടിഞ്ഞാറേ നടയില്‍ നിന്നാണ് കണ്ടെത്തിയത്. ഇവരെ കണ്‍ട്രോള്‍ റൂമിലേക്ക് മാറ്റിയതായി പൊലിസ് അറിയിച്ചു.

കമ്പളക്കാട് താമസിക്കുന്ന വിമജ മക്കളായ വൈഷ്ണവ് (12) വൈശാഖ് (11) സ്‌നേഹ (9) അഭിജിത്ത് (5) ശ്രീലക്ഷ്മി (4) എന്നിവരെയാണ് കാണാതായത്. 18ാം തിയ്യതി വൈകീട്ടോടെ കോഴിക്കോട് ചേളാരിയിലുള്ള സ്വന്തം വീട്ടിലേക്കെന്ന് പറഞ്ഞാണ് യുവതി മക്കളെയും കൊണ്ട് വീട് വിട്ടിറങ്ങിയത്. എന്നാല്‍ ഇവര്‍ ബന്ധു വീട്ടില്‍ എത്തിയല്ലെന്ന് പിന്നീട് വിവരം കിട്ടി. ഫോണില്‍ ബന്ധപ്പെടാന്‍ ശ്രമിച്ചെങ്കിലും സാധിച്ചില്ല. തുടര്‍ന്ന് ബന്ധുക്കള്‍ കമ്പളക്കാട് പൊലിസില്‍ പരാതി നല്‍കുകയായിരുന്നു.

യുവതിയുടെ മൊബൈല്‍ സിഗ്നല്‍ ട്രാക്ക് ചെയ്ത പൊലിസിന് ഇവര്‍ ഫറോക്കില്‍ ചെന്നിട്ടുണ്ടെന്ന വിവരം കിട്ടിയിരുന്നു. ഇതോടെ ഭര്‍ത്താവിനെയും കൂട്ടി പൊലിസ് സംഘം ഫറോക്കിലേക്ക് തിരിച്ചെങ്കിലും കുടുംബത്തെ കണ്ടെത്താന്‍ സാധിച്ചില്ല. അതിനിടെ അമ്മയെയും മക്കളെയും കണ്ണൂരിലും ഷൊര്‍ണൂരിലും വെച്ച് കണ്ടതായും പൊലിസിന് വിവരം ലഭിച്ചിരുന്നു. ഷൊര്‍ണൂരില്‍ എത്തിയ യുവതി അവിടെയുണ്ടായിരുന്ന ബന്ധുവിന്റെ കടയില്‍ നിന്ന് പണം വാങ്ങിയതായാണ് റിപ്പോര്‍ട്ട്. കണ്ണൂരില്‍ നിന്ന് ഷൊര്‍ണ്ണൂരിലെത്തിയെന്നാണ് വിവരം.