വേനൽകാലത്തിന് ഗുഡ് ബൈ; ഇനി ശൈത്യത്തിന്റെ നാളുകൾ, ഇന്ന് റെഡ്, യെല്ലോ അലർട്ടുകൾ

അബുദാബി: കഴിഞ്ഞ രണ്ട് മാസക്കാലത്തോളമായി തുടരുന്ന കൊടും ചൂടിനോട് ഔദ്യോഗികമായി വിടപറഞ്ഞ് യുഎഇ. ഇന്നലെ വൈകീട്ടോടെ വേനൽക്കാലത്തിനോട് വിടപറഞ്ഞ രാജ്യത്ത് ഇനി തണുപ്പിന്റെ നാളുകളായിരിക്കും. ഔദ്യോഗികമായി ശൈത്യകാലം ഇന്ന് മുതലാണെങ്കിലും ഒക്ടോബർ രണ്ട് മുതലാകും രാജ്യം പൂർണമായി ശൈത്യകാലത്തേക്ക് എത്തുക. നാഷണൽ സെന്റർ ഓഫ് മെറ്റീരിയോളജിയുടെ കണക്ക് പ്രകാരം വരാനിരിക്കുന്ന ആഴ്‌ച നേരിയതോ ഭാഗികമായോ മേഘാവൃതമായ കാലാവസ്ഥ ഉള്ളതാകും. ചില ദിവസങ്ങളിൽ അതിരാവിലെ മൂടൽമഞ്ഞ് രൂപപ്പെടാനുള്ള സാധ്യതയുണ്ട്.

രാജ്യത്ത് ഇന്ന് നേരിയതോ മിതമായതോ ആയ കാറ്റ് വീശും. ചില സമയങ്ങളിൽ കാറ്റിന് ശക്തി കൂടാൻ സാധ്യതയുണ്ട്. പ്രത്യേകിച്ച് കിഴക്ക് ഭാഗത്തായിരിക്കും കാറ്റ് കൂടുതൽ ഉണ്ടാവുക. ഈ ഭാഗങ്ങളിൽ പൊടിക്കാറ്റിന് സാധ്യതയുണ്ട്. രാവിലെയും രാത്രിയും കനത്ത മഞ്ഞിന് സാധ്യതയുള്ളതിനാൽ റെഡ്, യെല്ലോ ഫോഗ് അലർട്ട് പ്രഖ്യാപിച്ചിട്ടുണ്ട്.

കനത്ത മൂടൽമഞ്ഞിൽ കാഴ്ച പരിമിതമായിരിക്കുമെന്നതിനാൽ ജാഗ്രത പാലിക്കണമെന്ന് അധികൃതർ നിർദേശം നൽകിയിട്ടുണ്ട്. ചില ആഭ്യന്തര, തീരപ്രദേശങ്ങളിൽ പ്രത്യേകിച്ച് പടിഞ്ഞാറ് ഭാഗത്തേക്ക് പുലർച്ചെ 2 മുതൽ രാവിലെ 8.30 വരെ കനത്ത മഞ്ഞുണ്ടാകാനുള്ള സാധ്യതയുണ്ട്.

എന്നാൽ പകൽ സമയങ്ങളിൽ ചില തീരപ്രദേശങ്ങളിൽ താപനില ഉയരാൻ സാധ്യതയുണ്ട്. 47 ഡിഗ്രി സെൽഷ്യസ് വരെ ഉയർന്നേക്കാം. അബുദാബിയിലും ദുബായിലും 44 ഡിഗ്രി സെൽഷ്യസായി ഉയരും. രണ്ടിടത്തും കുറഞ്ഞ താപനില 30 ഡിഗ്രി സെൽഷ്യസും പർവതപ്രദേശങ്ങളിൽ 23 ഡിഗ്രി സെൽഷ്യസും വരെയാകാം.

ഇന്ന് രാത്രിയിലും ഞായറാഴ്ച രാവിലെയും ഈർപ്പമുള്ളതായിരിക്കും അന്തരീക്ഷം. അറേബ്യൻ ഗൾഫിലും ഒമാൻ കടലിലും കടലിൽ സ്ഥിതി നേരിയ തോതിൽ ആയിരിക്കും.