ബെയ്ജിങ് • ഷീ ജിൻ പിങ് വീണ്ടും ചൈനയുടെ പ്രസിഡന്റാകുമെന്ന് റിപ്പോർട്ടുകൾ. അഞ്ചു വർഷത്തെ ഭരണം കൂടി ഷീ ജിൻ പിങ്ങിന് ലഭിക്കുമെന്നാണ് പുറത്തുവരുന്ന റിപ്പോർട്ടുകൾ. 1970 ൽ മാവോസേതൂങ്ങിന് ശേഷം ചൈനയിലെ ശക്തനായ ഭരണാധികാരിയാണ് ജിൻപിങ്. 69 കാരനായ ജിൻപിങ് വരുന്ന പാർട്ടി കോൺഗ്രസിന് ശേഷമാണ് വീണ്ടും നേതാവായി തെരഞ്ഞെടുക്കപ്പെടുക. പ്രസിഡന്റ് പദത്തിൽ തുടരാൻ രണ്ടുവട്ടം മാത്രമേ കഴിയൂ എന്ന നിബന്ധന 2018ൽ ഷീ ജിൻപിങ് എടുത്തുകളഞ്ഞിരുന്നു. വരുന്ന ഒക്ടോബർ 16 നാണ് പാർട്ടി കോൺഗ്രസ് തുടങ്ങുക. ചൈനീസ് കമ്യൂണിസ്റ്റ് പാർട്ടിയുടെ ചരിത്രത്തിൽ സുപ്രധാന പാർട്ടി കോൺഗ്രസ് ആണ് വരാനിരിക്കുന്നതെന്ന് മാധ്യമങ്ങൾ പറയുന്നു. നിലവിൽ കമ്യൂണിസ്റ്റ് പാർട്ടി ജനറൽ സെക്രട്ടറിയും ചൈനയുടെ പ്രസിഡന്റും സൈന്യത്തിന്റെ ചുമതലയുള്ള സെൻട്രൽ മിലിറ്ററി കമ്മിഷൻ മേധാവിയുമാണ് ഷീ. ചൈനയിലെ പരമോന്നത നേതാവാണെന്ന് ചുരുക്കം. പാർട്ടിയുടെയും സൈന്യത്തിന്റെയും രാജ്യത്തിൻ്റെയും തലപ്പത്ത് എത്തിയ ഷീയുടെ മുന്നോട്ടുള്ള പ്രയാണത്തിന് പാർട്ടി കോൺഗ്രസ് നിർണായകമാണ്.

ടിയാനൻമെൻ ചത്വര ഗ്രേറ്റ് ഹാളിൽ നടക്കുന്ന പാർട്ടി കോൺഗ്രസിൽ 2,300 പ്രതിനിധികളാണ് പങ്കെടുക്കുക. ഇതിൽ 200 പേർ പാർട്ടി കേന്ദ്ര കമ്മിറ്റിയിലേക്ക് തെരഞ്ഞെടുക്കപ്പെടും. 170 പേർ മറ്റ് അംഗങ്ങളായും തെരഞ്ഞെടുക്കപ്പെടും. കേന്ദ്ര കമ്മിറ്റിയിൽ നിന്ന് 25 പേരെ പോളിറ്റ് ബ്യൂറോയിലേക്ക് തെരഞ്ഞെടുക്കും. പോളിറ്റ് ബ്യൂറോയാണ് സ്ഥിരം സമിതിയിലേക്ക് അംഗങ്ങളെ തെരഞ്ഞെടുക്കുക. ഈ സമിതിയിൽ ഏഴ് അംഗങ്ങളാണുണ്ടാകുക. ഷീ ജിൻപിങ് ഉൾപ്പെടെ ഏഴു പേരാണ് നിലവിൽ പോളിറ്റ് ബ്യൂറോ സ്ഥിരം സമിതിയിൽ ഉള്ളത്. ഇവരാണ് ചൈനയിലെ ഏറ്റവും മുതിർന്ന ഉദ്യോഗസ്ഥരും നേതാക്കളും. പ്രസിഡന്റ്, വൈസ് പ്രസിഡന്റ്, പ്രധാനമന്ത്രി, രാഷ്ടീയ നയവക്താവ്, നാഷനൽ പീപ്പിൾസ് കോൺഗ്രസ് ചെയർമാൻ, അഴിമതി വിരുദ്ധ വിഭാഗം തലവൻ, രാഷ്ട്രീയ ഉപദേഷ്ടാവ് എന്നിവരാണിവർ.