കൊച്ചി: കേരള ബുക്‌സ് ആന്‍ഡ് പബ്ലിക്കേഷന്‍സ് സൊസൈറ്റി വളപ്പിലെ 350 ഓളം തേക്ക് മരങ്ങള്‍ മുറിച്ചതുമായി ബന്ധപ്പെട്ട് എം.ഡി ടോമിന്‍ ജെ. തച്ചങ്കരിക്കെതിരേ വിജിലന്‍സ് ത്വരിത പരിശോധന തുടങ്ങി.
പരിസ്ഥിതി പ്രവര്‍ത്തകനായ പ്രൊഫ. എസ് സീതാരാമന്‍ നല്‍കിയ പരാതിയില്‍ വിജിലന്‍സ് ഡയരക്ടര്‍ ജേക്കബ് തോമസിന്റെ നിര്‍ദേശ പ്രകാരം എറണാകുളം വിജിലന്‍സ് റേഞ്ചാണ് അന്വേഷണം നടത്തുന്നത്. കെ.ബി.പി.എസിന്റെ സ്ഥലത്ത് സ്ഥിതിചെയ്യുന്ന 350 ഓളം മരങ്ങള്‍ മാസങ്ങള്‍ക്കു മുന്‍പ് മുറിച്ചുകടത്തിയതിലൂടെ തച്ചങ്കരി രണ്ടു കോടിയോളം രൂപയുടെ അഴിമതി നടത്തിയെന്നാണ് വിജിലന്‍സിന് ലഭിച്ചിട്ടുള്ള പരാതി.
സര്‍ക്കാര്‍ ഭൂമിയിലുള്ള മരങ്ങള്‍ മുറിക്കുന്നതിന് എടുക്കേണ്ട നടപടിക്രമങ്ങള്‍ പാലിക്കാതെയാണ് വിലപിടിപ്പുള്ള മരങ്ങള്‍ വെട്ടിയത്. യാതൊരു പരിശോധനയും നടത്താതെ സ്വാധീനത്തിന് വഴങ്ങി അന്നത്തെ അസിസ്റ്റന്റ് ഫോറസ്റ്റ് കണ്‍സര്‍വേറ്റര്‍ അനധികൃതമായി അനുമതി നല്‍കുകയായിരുന്നുവെന്ന് അന്ന് പരിസ്ഥിതി കമ്മിറ്റി അംഗം കൂടിയായിരുന്ന പരാതിക്കാരന്‍ ആരോപിക്കുന്നു.
ഇത്തരത്തില്‍ നല്‍കുന്ന അനുമതിക്ക് പരമാവധി രണ്ടു വര്‍ഷം മാത്രമാണ് പ്രാബല്യമുണ്ടാകുക. എന്നാല്‍ തച്ചങ്കരി കെ.ബി.പി.എസ് എം.ഡി ആയ ശേഷം അഞ്ചുവര്‍ഷം മുമ്പ് ലഭിച്ച കാലഹരണപ്പെട്ട അനുമതി ഉപയോഗിച്ച്  കോംപൗണ്ടിലെ മരങ്ങള്‍ മുറിച്ചുമാറ്റുകയായിരുന്നു.  ഓഫിസിലേക്ക് ആവശ്യമായ ഫര്‍ണിച്ചര്‍ ഉണ്ടാക്കിയെന്നാണ് ബന്ധപ്പെട്ടവര്‍ നല്‍കിയിട്ടുള്ള വിശദീകരണം. എന്നാല്‍ തച്ചങ്കരിയുടെ റിസോര്‍ട്ടിലേക്കടക്കം തടി എത്തിയിട്ടുണ്ടാകാമെന്നാണ് ആരോപണമുള്ളത്.
ത്വരിത പരിശോധനയില്‍ ആരോപണങ്ങളില്‍ കഴമ്പുണ്ടെന്നുകണ്ടാല്‍ വിജിലന്‍സ് കോടതിയില്‍ കേസ് രജിസ്റ്റര്‍ ചെയ്ത് അന്വേഷണം നടത്തും.