കാബൂള്‍: അഫ്ഗാനിസ്ഥാനില്‍ താലിബാന്‍- അഫ്ഗാന്‍ സുരക്ഷാ സേനാ പോരാട്ടം തുടരുന്നു. നിരവധി പ്രദേശങ്ങള്‍ പിടിച്ചെടുത്ത താലിബാനില്‍ നിന്ന് തിരിച്ചുപിടിക്കാനുള്ള ശ്രമത്തിലാണ് അഫ്ഗാന്‍ സുരക്ഷാ സേന. അതിനിടെ, ഇന്ന് കാണ്ഡഹാര്‍ വിമാനത്താവളത്തില്‍ റോക്കറ്റ് പതിച്ചു.

റണ്‍വേയില്‍ രണ്ട് റോക്കറ്റുകള്‍ പതിച്ചുവെന്ന് എയര്‍പോര്‍ട്ട് മേധാവി മസൂദ് പഷ്തൂണ്‍ പറഞ്ഞു. സംഭവത്തെ തുടര്‍ന്ന് എയര്‍പോര്‍ട്ട് അടച്ചിട്ടിരിക്കുകയാണ്. അറ്റകുറ്റ പണി നടക്കുകയാണെന്നും അദ്ദേഹം വ്യക്തമാക്കി.

സംഭവത്തില്‍ ആളപായങ്ങളൊന്നും റിപ്പോര്‍ട്ട് ചെയ്തിട്ടില്ല.

റോക്കറ്റാക്രമണത്തിനു പിന്നില്‍ തങ്ങളാണെന്ന് താലിബാന്‍ വക്താവ് സൈബുല്ല മുജാഹിദ് പറഞ്ഞു. തങ്ങള്‍ക്കെതിരെ ആക്രമണത്തിനായി സൈന്യം വിമാനത്താവളം ഉപയോഗിക്കുന്നതു കൊണ്ടാണ് റോക്കറ്റ് വിട്ടതെന്ന് സൈബുല്ല മുജാഹിദ് പറഞ്ഞു.