പ്ലസ് വണ്‍ ഇംപ്രൂവ്‌മെന്റ് പരീക്ഷാ തീയതി മാറ്റം; കായിക മേള നടത്തിപ്പ് പ്രതിസന്ധിയില്‍

കല്‍പ്പറ്റ• സ്‌കൂള്‍ കായിക മേളകള്‍ക്ക് പുറമേ സംസ്ഥാന ജൂനിയര്‍സീനിയര്‍ അത്‌ലറ്റിക് മീറ്റ് നടത്തിപ്പും പ്രതിസന്ധിയിലാക്കി വിദ്യാഭ്യാസ വകുപ്പിന്റെ പ്ലസ് വണ്‍ ഇംപ്രൂവ്‌മെന്റ് പരീക്ഷാ തീയതി നിര്‍ണയം. ഒക്ടോബര്‍ 9 മുതല്‍ 13 വരെയാണ് പുതുക്കിയ പരീക്ഷാ തീയതി. സെപ്റ്റംബര്‍ 25 മുതല്‍ 29 വരെ നടക്കേണ്ടിയിരുന്ന പരീക്ഷ കോഴിക്കോട് നിപാ സ്ഥിരീകരിച്ച സാഹചര്യത്തിലാണ് മാറ്റിവച്ചത്.

ഒക്ടോബര്‍ 16 മുതല്‍ 20 വരെയാണ് സംസ്ഥാന സ്‌കൂള്‍ കായിക മേള തൃശൂരില്‍ നടക്കുന്നത്. ഇതിന് മുന്നോടിയായുള്ള സബ് ജില്ലാ കായിക മേളകള്‍ ഒക്ടോബര്‍ ആദ്യവാരത്തിലും ജില്ലാ കായിക മേളകള്‍ രണ്ടാം വാരത്തിലും നടത്താനായിരുന്നു നേരത്തെ നിശ്ചയിച്ചിരുന്നത്. സെപ്റ്റംബര്‍ 28 മുതല്‍ ഓക്ടോബര്‍ രണ്ടുവരെ അത്‌ലറ്റിക് അസോസിയേഷന്റെ നേതൃത്വത്തില്‍ കോഴിക്കോട് സര്‍വകലാശാലാ സ്റ്റേഡിയത്തില്‍ ജൂനിയര്‍സീനിയര്‍ സംസ്ഥാന അത് ലറ്റിക് മീറ്റും തീരുമാനിച്ചിരുന്നു. പരീക്ഷാ തീയതി പുതുക്കിയതോടെ സബ് ജില്ലാ കായിക മേളകള്‍ ജൂനിയര്‍സീനിയര്‍ സംസ്ഥാന അത് ലറ്റിക് മീറ്റ് നടക്കുന്ന തീയതികളിലാകും മിക്ക ജില്ലകളിലും നടക്കുക. ഇത് കായിക താരങ്ങളുടെ അവസരം നഷ്ടപ്പെടുത്തുമെന്ന ആക്ഷേപമാണുയരുന്നത്.

സംസ്ഥാന അത്‌ലറ്റിക് മീറ്റ് നടക്കുന്ന തീയതികളിലാണ് വയനാട് ജില്ലയിലെ മൂന്ന് സബ് ജില്ലകളിലും സബ് ജില്ലാ കായിക മേള തീരുമാനിച്ചിരിക്കുന്നത്. ഇത് സംസ്ഥാന ജൂനിയര്‍ സീനിയര്‍ അത്‌ലറ്റിക് മീറ്റില്‍ മെഡല്‍ പ്രതീക്ഷയുള്ള താരങ്ങളെ ബാധിക്കുമെന്ന് കായികാധ്യാപകരും പരിശീലകരും പറയുന്നു. പരീക്ഷാ തീയതി മാറ്റി കായിക മേളയുടെ സുഗമമായ നടത്തിപ്പ് സാധ്യമാക്കണമെന്ന ആവശ്യം ശക്തമാണ്.