മലപ്പുറം: മാനദണ്ഡം പാലിക്കാത്തതിനെ തുടര്‍ന്ന് സംസ്ഥാനത്ത് പുതുതായി അനുവദിച്ച ഹയര്‍ സെക്കന്‍ഡറി വിഭാഗത്തിലെ ഒന്‍പത് സ്വാശ്രയ എന്‍.എസ്.എസ് യൂനിറ്റുകളുടെ അംഗീകാരം സര്‍ക്കാര്‍ റദ്ദാക്കി. 2016-17 അധ്യയന വര്‍ഷത്തില്‍ വിവിധ ജില്ലകളിലായി  212 പുതിയ സ്വാശ്രയ എന്‍.എസ്.എസ് യൂനിറ്റുകളായിരുന്നു സര്‍ക്കാര്‍  അനുവദിച്ചിരുന്നത്.
അംഗീകാരം ലഭിച്ച സ്‌കൂളുകളില്‍ എന്‍.എസ്.എസ് യൂനിറ്റ് പ്രവര്‍ത്തനം ആരംഭിക്കുംമുന്‍പ്  പ്രിന്‍സിപ്പല്‍, പ്രോഗ്രാം കണ്‍വീനര്‍ എന്നിവര്‍ മൂന്നു ഘട്ടങ്ങളിലായുള്ള ദ്വിദിന ശില്‍പശാലയില്‍ പങ്കെടുക്കണമെന്ന് നിര്‍ദേശിച്ചിരുന്നു.
ഇതുസംബന്ധിച്ച് കൃത്യമായ വിശദീകരണം നല്‍കാത്ത ഒന്‍പത് വിദ്യാലയങ്ങള്‍ക്കെതിരേയാണ് നടപടി. ഇതില്‍ സര്‍ക്കാര്‍ വിദ്യാലയങ്ങളും ഉള്‍പ്പെടുന്നുണ്ട്.
ക്രൈസ്റ്റ് നഗര്‍ ഇ.എച്ച്.എസ്.എസ് കവടിയാര്‍ തിരുവനന്തപുരം, തൃശൂര്‍ ഫോക്കസ് ഐ.ഇ.എച്ച്.എസ്.എസ്, തൃശൂര്‍ സെന്റ് ജോസഫ്‌സ് സി.ജി.എച്ച്.എസ്.എസ്, പാലക്കാട് കുമരനല്ലൂര്‍ ഗോഖലെ ജി.എച്ച്.എസ്.എസ്, അട്ടപ്പാടി പുതൂര്‍ ജി.ടി.എച്ച്.എസ്.എസ്, കോഴിക്കോട് പറയഞ്ചേരി ജി.ജി.എച്ച്.എസ്.എസ്, കോഴിക്കോട് ഇരിങ്ങല്ലൂര്‍ ജി.എച്ച്.എസ്.എസ്, കണ്ണൂര്‍ കൂത്തുപറമ്പ് എച്ച്.എസ്.എസ്, വളപട്ടണം താജുല്‍ ഉലൂം ഇ.എം.എച്ച്.എസ്.എസ് എന്നീ സ്‌കൂളുകളിലെ സ്വാശ്രയ എന്‍.എസ്.എസ് യൂനിറ്റുകളുടെ അംഗീകാരമാണ് റദ്ദാക്കിക്കൊണ്ട് ഹയര്‍ സെക്കന്‍ഡറി ഡയറക്ടര്‍ ഉത്തരവിറക്കിയത്.