ടോക്കിയോ: ഒളിംപിക്‌സില്‍ ചരിത്രമെഴുതി ഇന്ത്യന്‍ വനിതാ ഹോക്കി ടീം. ചരിത്രത്തില്‍ ആദ്യമായി ഒളിംപിക്‌സ് ഹോക്കിയുടെ സെമി ഫൈനലില്‍ പ്രവേശിച്ചാണ് ഇന്ത്യന്‍ വനിതകള്‍ ചരിത്രം തിരുത്തിക്കുറിച്ചത്. ഇന്നലെ നടന്ന ക്വാര്‍ട്ടര്‍ ഫൈനല്‍ പോരാട്ടത്തില്‍ എതിരില്ലാത്ത ഒരു ഗോളിന് നിലവിലെ ചാംപ്യന്‍മാരായ ആസ്‌ത്രേലിയയെ തകര്‍ത്താണ് ഇന്ത്യ സെമി ഫൈനല്‍ ഉറപ്പിച്ചത്. മത്സരത്തില്‍ ഇന്ത്യക്ക് ഗോളുകള്‍ സ്വന്തമാക്കാന്‍ പെനാല്‍റ്റി കോര്‍ണറുകള്‍ ഒരുപാട് ലഭിച്ചെങ്കിലും ഇന്ത്യന്‍ സംഘത്തിന് അത് മുതലെടുക്കാന്‍ സാധിച്ചില്ല. ഒടുവില്‍ നാലാം ക്വാര്‍ട്ടറില്‍ ലഭിച്ച അവസരം മുതലാക്കിയ ഇന്ത്യ ടോക്കിയോയില്‍ ചരിത്രം രചിക്കുകയായിരുന്നു.
ഗുര്‍ജിത് കൗറാണ് ഇന്ത്യക്കായി ചരിത്ര ഗോള്‍ സ്വന്തമാക്കിയത്. ഗോള്‍ നേടിയശേഷം ഇന്ത്യ പ്രതിരോധം ശക്തിപ്പെടുത്തിയതോടെ ആസ്‌ത്രേലിയക്ക് ഇന്ത്യന്‍ പ്രതിരോധം തകര്‍ക്കാന്‍ കഴിഞ്ഞില്ല. മറ്റൊരു ക്വാര്‍ട്ടറില്‍ ശക്തരായ അര്‍ജന്റീന എതിരില്ലാത്ത മൂന്ന് ഗോളിന് ജര്‍മനിയെ തകര്‍ത്തു. നാളെ നടക്കുന്ന സെമി ഫൈനല്‍ പോരാട്ടത്തില്‍ അര്‍ജന്റീനയെയായിരിക്കും ഇന്ത്യ നേരിടുക. ഗ്രൂപ്പ് ഘട്ടത്തിലെ ആദ്യ രണ്ട് മത്സരത്തില്‍ തോല്‍വി വഴങ്ങിയ ഇന്ത്യ പിന്നീട് ശക്തമായ തിരിച്ചുവരവായിരുന്നു നടത്തിയത്.