കാസര്‍കോട് വാഹനാപകടത്തില്‍ നാല് മരണം

കാസര്‍കോട്: കാസര്‍കോട് വാഹനാപകടത്തില്‍ നാല് മരണം. ബദിയഡുക്ക പള്ളത്തടുക്കയില്‍ വെച്ച് സ്‌കൂള്‍ ബസും ഓട്ടോറിക്ഷയും കൂട്ടിയിടിച്ചാണ് അപകടം. ഓട്ടോറിക്ഷയില്‍ സഞ്ചരിച്ച നാലുപേരാണ് മരിച്ചത്. ഗ്ലോബല്‍ സ്‌കൂള്‍ വാഹനമാണ് ഓട്ടോയില്‍ ഇടിച്ചത്.

യാത്രക്കാരായ നാല് സ്ത്രീകളും ഓട്ടോറിക്ഷ ഡ്രൈവറുമാണ് മരിച്ചത്. വൈകുന്നേരം നാലരയോടെയാണ് അപകടം. സ്‌കൂള്‍ കുട്ടികളെ വീട്ടിലിറക്കി തിരിച്ചു വരികയായിരുന്ന ബസും ഓട്ടോറിക്ഷയും തമ്മില്‍ കൂട്ടിയിടിക്കുകയായിരുന്നു. മൊഗ്രാല്‍ പുത്തുര്‍ സ്വദേശി എ.എച്ച് അബ്ദുല്‍ റഊഫാണ് ഓട്ടോറിക്ഷ ഓടിച്ചിരുന്നത്. അപകടത്തില്‍ ഓട്ടോറിക്ഷ പൂര്‍ണമായി തകര്‍ന്നിട്ടുണ്ട്.

മൊഗ്രാല്‍ പുത്തൂര്‍ കടവത്ത് സ്വദേശികളായ ഓട്ടോ ഡ്രൈവര്‍ അബ്ദുല്‍ റഊഫ്, ബീഫാത്തിമ, നബീസ, ബീഫാത്തിമ മൊഗര്‍, ഉമ്മു ഹലീമ എന്നിവരാണ് മരിച്ചത്.