പ്രത്യേക ലേഖകൻ
തിരുവനന്തപുരം • കൊവിഡ് കാലത്ത് പി.പി.ഇ കിറ്റുകൾ അടക്കമുള്ളവ വാങ്ങിയതുമായി ബന്ധപ്പെട്ട പരാതിയിൽ മുൻ ആരോഗ്യ മന്ത്രി കെ.കെ ശൈലജക്കെതിരേ അന്വേഷണത്തിന് ലോകായുക്ത ഉത്തരവ്. നേരിട്ടോ അഭിഭാഷകൻ മുഖാന്തിരമോ ഡിസംബർ എട്ടിന് ഹാജരാകാനാണ് ശൈലജയ്ക്ക് നോട്ടിസ് നൽകിയിരിക്കുന്നത്. ഇവരുടെ വാദം കേൾക്കുന്നതിനൊപ്പം രേഖകൾ പരിശോധിച്ച് ലോകായുക്ത നടപടി സ്വീകരിക്കും.

യൂത്ത് കോൺഗ്രസ് നേതാവ് വീണ എസ്. നായരാണ് അന്വേഷണം ആവശ്യപ്പെട്ട് ലോകായുക്തയെ സമീപിച്ചത്.
ശൈലജ, മരുന്നു വാങ്ങലിനു നേതൃത്വം നൽകിയ ഉദ്യോഗസ്ഥർ അടക്കമുള്ളവർക്ക് നോട്ടിസ് അയച്ച് പ്രാഥമിക വാദവും അന്വേഷണവും പൂർത്തിയായതിനെ തുടർന്നാണ് കേസ് ഫയലിൽ സ്വീകരിച്ചത്.
ശൈലജയ്ക്കു പുറമേ അന്നത്തെ ആരോഗ്യ സെക്രട്ടറി രാജൻ എൻ. ഖോബ്രഗഡെ, മെഡിക്കൽ സർവിസസ് കോർപറേഷൻ എം.ഡിയായിരുന്ന ബാലമുരളി, മെഡിക്കൽ സർവിസസ് കോർപറേഷൻ മുൻ ജനറൽ മാനേജർ എസ്.ആർ ദിലീപ് കുമാർ, സ്വകാര്യ കമ്പനി പ്രതിനിധികൾ ഉൾപ്പെടെ 11 പേർക്കെതിരെയാണ് വീണ പരാതി നൽകിയത്.

കൊവിഡ് കാലത്ത് പി.പി.ഇ കിറ്റുകളും സർജിക്കൽ ഉപകരണങ്ങളും വാങ്ങിയതിൽ അഴിമതി നടന്നതായി വീണ നൽകിയ പരാതിയിൽ ആരോപിക്കുന്നു. കേരളത്തിലുടനീളം മരുന്നുകളും സർജിക്കൽ ഉപകരണങ്ങളും കുറഞ്ഞ നിരക്കിൽ വിതരണം ചെയ്യേണ്ടതിന്റെ ഉത്തരവാദിത്വം മെഡിക്കൽ സർവിസസ് കോർപറേഷനാണ്. എന്നാൽ ചട്ടങ്ങൾ പാലിക്കാത്തതിനാൽ ഖജനാവിനു വലിയ നഷ്ടമുണ്ടായി.

വിപണി നിരക്കിനേക്കാൾ ഉയർന്ന നിരക്കിലാണ് സ്വകാര്യ കമ്പനികളിൽനിന്ന് പി.പി.ഇ കിറ്റുകൾ വാങ്ങിയത്. കിറ്റുകൾ വിതരണം ചെയ്യുന്നതിനു മുൻപു തന്നെ ഒരു സ്വകാര്യ കമ്പനിക്ക് മുൻകൂറായി ഒൻപതു കോടി രൂപ അനുവദിച്ചു. കൊവിഡ് പർച്ചേസുമായി ബന്ധപ്പെട്ട ഫയലുകൾ കേരള മെഡിക്കൽ സർവിസ് കോർപറേഷൻ കംപ്യൂട്ടറിൽനിന്ന് മായ്ച്ച് കളഞ്ഞുവെന്നും വീണയുടെ പരാതിയിൽ പറയുന്നു.