കൊച്ചി: തലശ്ശേരി ഫസല്‍ വധക്കേസിലെ പ്രതികളായ സി.പി.എം നേതാക്കളായ കാരായി രാജനും കാരായി ചന്ദ്രശേഖരനും മൂന്നു മാസം കൂടി കഴിഞ്ഞാല്‍ കണ്ണൂരില്‍ പ്രവേശിക്കാം. കേസില്‍ തുടരന്വേഷണം നടക്കുകയാണ്. അന്വേഷണത്തിന്റെ കാലാവധി മൂന്നു മാസം കൂടിയുണ്ട്. അതുവരേ എറണാകുളത്തുതന്നെ തടരണം. സി.പി.എം കണ്ണൂര്‍ ജില്ലാ സെക്രട്ടേറിയറ്റ് അംഗം കാരായി രാജനും ഏരിയാ കമ്മിറ്റി അംഗം കാരായി ചന്ദ്രശേഖരനുമാണ് ജാമ്യ വ്യവസ്ഥയില്‍ ഇളവ് ലഭിച്ചത്. കേസില്‍ തുടരന്വേഷണം നടക്കുന്ന സാഹചര്യത്തിലാണ് മൂന്നുമാസം കൂടി ജില്ലയില്‍ തുടരണമെന്ന് ഹൈക്കോടതി നിര്‍ദേശിച്ചത്.

2014ല്‍ ഫസല്‍ കേസില്‍ ഇരുവര്‍ക്കും ജാമ്യം അനുവദിച്ചിരുന്നു. എന്നാല്‍ അന്ന് രണ്ടു പ്രതികളും എറണാകുളം ജില്ല വിട്ടുപോകരുതെന്ന് ഹൈക്കോടതി നിര്‍ദേശിച്ചിരുന്നു. ഇത് പ്രകാരം ജില്ലയില്‍ തന്നെ താമസിക്കുകയായിരുന്നു ഇരുവരും. ഇതിനിടെ നിരവധി തവണ ജാമ്യവ്യവസ്ഥയില്‍ ഇളവ് തേടി കോടതിയെ സമീപിച്ചെങ്കിലും ആവശ്യം കോടതി നിരസിക്കുകയായിരുന്നു.

ഹൈക്കോടതിയുടെ നിര്‍ദേശ പ്രകാരം ഫസല്‍ വധക്കേസ് സി.ബി.ഐയുടെ പ്രത്യേക സംഘത്തിന്റെ തുടരന്വേഷണം പുരോഗമിക്കുകയാണ്. ഫസലിന്റെ കൊലപാതകത്തിന് പിന്നില്‍ ആര്‍.എസ്.എസ് പ്രവര്‍ത്തകരാണെന്ന മൊഴിയുടെ അടിസ്ഥാനത്തില്‍ സി.ബി.ഐ അന്വേഷണം ആവശ്യപ്പെട്ട് സഹോദരന്‍ സത്താറാണ് ഹൈക്കോടതിയെ സമീപിച്ചത്.