ബാഴ്‌സലോണ: രണ്ടു തവണ അജാക്‌സിന്റെ പ്ലെയര്‍ ഓഫ് ദി സീസണായ ഹോളണ്ട് ഗോള്‍ കീപ്പര്‍ ജാസ്പര്‍ സില്ലസ്സന്‍ ഇനി ലാ ലിഗ വമ്പന്‍മാരായ ബാഴ്‌സലോണയുടെ വലകാക്കും. ബാഴ്‌സയുടെ നിലവിലെ ഗോള്‍ കീപ്പര്‍ ക്ലൗഡിയോ ബ്രാവോയുടെ പകരക്കാരനായിട്ടാണ് സില്ലസ്സന്‍ എത്തുന്നത്. അഞ്ചു വര്‍ഷത്തെ കരാറിലാണ് നിയമനം.  ഇക്കാര്യം ബാഴ്‌സലോണ ഔദ്യോഗികമായി അറിയിച്ചിട്ടുണ്ട്. 13 മില്ല്യണ്‍ യുറോയാണ് കരാര്‍ തുക.  ദീര്‍ഘകാലമായുള്ള സ്വപ്നം ഇതോടെ യാഥാര്‍ഥ്യമായെന്ന് സില്ലസ്സന്‍ ട്വിറ്ററില്‍ കുറിച്ചു. 2011ലാണ് താരം അജാക്‌സിലെത്തുന്നത്. 2013 മുതല്‍ ഹോളണ്ടിന്റെ ഗോള്‍ വലകാക്കുന്നത് സില്ലസ്സനാണ്. 2014 ലോകകപ്പില്‍ ഹോളണ്ടിനെ മൂന്നാം സ്ഥാനത്തെത്തിക്കുന്നതില്‍ നിര്‍ണായ പങ്കുവഹിച്ച  ഗോള്‍കീപ്പറുമായിരുന്നു സില്ലസ്സന്‍.
അതേസമയം ക്ലൗഡിയോ ബ്രാവോയുമായി മാഞ്ചസ്റ്റര്‍ സിറ്റി കരാറൊപ്പിച്ചു. 13.75 മില്യണാണ് കരാര്‍ തുക. നാലു വര്‍ഷത്തെ കരാറിലാണ് താരം ക്ലബിലെത്തുന്നത്.