തിരുനബിയുടെമധുരസ്മരണയില്‍ഇന്ന് നബിദിനം

മലപ്പുറം: തിരുനബിയുടെ മധുരസ്മരണകളില്‍ ഇന്ന് നബിദിനം. മാനവസ്‌നേഹത്തിന്റെയും വിശ്വസമാധാനത്തിന്റെയും ദൂതനായ പ്രവാചകന്‍ മുഹമ്മദ് നബി(സ)യുടെ 1498ാം ജന്മദിനമാണ് ഇന്ന് വിപുലമായ പരിപാടികളോടെ വിശ്വാസികള്‍ ആഘോഷിക്കുന്നത്. നബി ജന്മദിനത്തെ വരവേറ്റ് പള്ളിമദ്‌റസാ അങ്കണങ്ങളും തെരുവോരങ്ങളും വീടകങ്ങളും അലങ്കാര തോരണങ്ങളാല്‍ അണിഞ്ഞൊരുങ്ങി.

സുബ്ഹിയോടടുത്തുള്ള പ്രവാചക പിറവി സമയത്ത് മസ്ജിദുകള്‍ കേന്ദ്രീകരിച്ചുള്ള മൗലിദ് പാരായണത്തോടെയാണ് ആഘോഷങ്ങള്‍ക്കുള്ള തുടക്കം. തിരുപിറവിയുടെ സന്ദേശം വിളച്ചോതി ഈ സമയം മസ്ജിദുകള്‍ പ്രവാചക പ്രകീര്‍ത്തനങ്ങള്‍ കൊണ്ട് മുഖരിതമായിരുന്നു. തുടര്‍ന്ന് മദ്‌റസകള്‍ കേന്ദ്രീകരിച്ച് നബി സ്മരണകളാല്‍ വര്‍ണാഭമായ ഘോഷയാത്രകള്‍, പ്രവാചകസ്‌നേഹത്തിന്റെ ഇശലുകള്‍ പരന്നൊഴുകുന്ന മൗലിദ് സദസുകള്‍, വിദ്യാര്‍ഥികളുടെ കലാപരിപാടികള്‍,അന്നദാനം തുടങ്ങിയ പരിപാടികളും നടക്കും. പുറമെ നബിസ്‌നേഹത്തിന്റെ മധുരം നിറഞ്ഞ ബുര്‍ദാ മജ്‌ലിസുകള്‍, മദ്ഹ് ഗീതങ്ങള്‍ക്ക് താളം നല്‍കുന്ന ദഫ് പ്രോഗ്രാം,സ്‌കൗട്ട് തുടങ്ങി പരിപാടികളും നബിദിനാഘോഷത്തെ വര്‍ണാഭമാക്കും.

മദ്‌റസാ വിദ്യാര്‍ഥികള്‍ക്കു പുറമെ പൂര്‍വവിദ്യാര്‍ഥികളും ബഹുജനങ്ങളും ആഘോഷപരിപാടികളുടെ ഭാഗമാവും. കേരളത്തില്‍ മസ്ജിദുകളും മദ്‌റസകളും അറബിക് കോളജുകളും കേന്ദ്രീകരിച്ചാണ് പ്രധാനമായും ആഘോഷ പരിപാടികള്‍ നടക്കുന്നത്. മുഹമ്മദ് നബി(സ)യുടെ ഉദാത്തമായ ജീവിത സന്ദേശങ്ങള്‍ മറ്റുള്ളവര്‍ക്ക് പകരാന്‍ ഉതകുന്നവിധം ആഘോഷ പരിപാടികള്‍ മാതൃകാപരമാവണമെന്ന് സമസ്ത നേതാക്കള്‍ ആഹ്വാനം ചെയ്തു.