അഖിലിനെതിരെ ഓഗസ്റ്റില്‍ പരാതിപ്പെട്ടു; മന്ത്രിയുടെ ഓഫിസിലെത്തിയതിന്റെ ചിത്രങ്ങള്‍ പുറത്തുവിട്ടു

മലപ്പുറം: ആയുഷ് വകുപ്പില്‍ ഹോമിയോ ഓഫിസര്‍ തസ്തികയിലെ നിയമനത്തിന് കോഴ നല്‍കിയ വിവരം ആരോഗ്യമന്ത്രിയുടെ ഓഫിസിനെ ഓഗസ്റ്റ് 17 ന് അറിയിച്ചിരുന്നതായി പരാതിക്കാരന്റെ സുഹൃത്തും സി.പി.ഐ വിദ്യാര്‍ഥി സംഘടനയുടെ നേതാവുമായിരുന്ന കെ.പി ബാസിത്. നേരിട്ട് പരാതി പറയാന്‍ മന്ത്രിയുടെ ഓഫീസില്‍ പോയതിന്റെ ചിത്രങ്ങള്‍ ബാസിത് പുറത്തുവിട്ടു.

മന്ത്രിയുടെ പേഴ്‌സണല്‍ സെക്രട്ടറി അഖില്‍ മാത്യുവിനെ പലവട്ടം ഫോണില്‍ വിളിച്ചിട്ടും നേരിട്ടു കാണാന്‍ തയ്യാറാവുന്നില്ലെന്ന പരാതി പ്രൈവറ്റ് സെക്രട്ടറിയെ ധരിപ്പിച്ചതായും ബാസിത് പറയുന്നു.

അഖിലിന്റെ ഭാഗത്തുനിന്ന് പ്രതികരണം ഒന്നുമില്ലാതായതോടെയാണ് ആരോഗ്യമന്ത്രിയുടെ ഓഫീസില്‍ നേരിട്ടെത്തി പരാതി അറിയിക്കാന്‍ തീരുമാനിക്കുന്നത്. ഇക്കാര്യം എസ്.എം.എസായി അഖില്‍ മാത്യുവിനെ അറിയിച്ചിരുന്നു. ഇതിന്റെ സ്‌ക്രീന്‍ഷോട്ടടക്കം ബാസിത് പുറത്തുവിട്ടു.

അതേസമയം ഹരിദാസിന്റെ മൊഴി പൊലീസ് രേഖപ്പെടുത്തും. മലപ്പുറം സ്വദേശിയായ ഹരിദാസിനോട് രേഖകള്‍ ഉള്‍പ്പടെ ഹാജരാക്കി മൊഴിനല്‍കാന്‍ കന്റോണ്‍മെന്റ് പൊലീസ് ആവശ്യപ്പെട്ടിട്ടുണ്ട്. മന്ത്രിയുടെ പിഎ അഖില്‍ മാത്യുവിന്റെ പരാതിയിലാണ് കേസ്.