അവധി ദിനത്തിൽ പുറത്തിറങ്ങാൻ പോവുകയാണോ? യുഎഇയിലെ ഇന്നത്തെ താപനില അറിയാം

ദുബൈ: വാരാന്ത്യത്തിൽ കുടുംബത്തിനും സുഹൃത്തുക്കൾക്കുമൊപ്പം പുറത്തേക്ക് പോകാൻ പദ്ധതിയുണ്ടോ? പതിവിൽ നിന്നും ഇന്ന് താപനിലയിൽ നേരിയ കുറവുണ്ടാകുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. നാഷണൽ സെന്റർ ഓഫ് മെറ്റീരിയോളജി അനുസരിച്ച്, ഇന്ന് അന്തരീക്ഷം ഭാഗികമായി മേഘാവൃതമായിരിക്കും.

രാജ്യത്ത് താപനില ക്രമേണ കുറയുകയാണ്. വാരാന്ത്യത്തിലെ കാലാവസ്ഥാ പ്രവചനം അനുസരിച്ച് ഈ ദിവസങ്ങൾ പൊതുവെ വെയിലായിരിക്കുമെന്നും താപനില ഇനിയും കുറയുമെന്നും നാഷണൽ സെന്റർ ഓഫ് മെറ്റീരിയോളജി പറയുന്നു.

രാജ്യത്തിന്റെ ഉൾപ്രദേശങ്ങളിൽ പരമാവധി താപനില 38 നും 42 ഡിഗ്രി സെൽഷ്യസിനും ഇടയിലായിരിക്കുമെന്നാണ് പ്രതീക്ഷ. തീരപ്രദേശങ്ങളിലും ദ്വീപുകളിലും താപനില 35 മുതൽ 40 ഡിഗ്രി സെൽഷ്യസ് വരെയും പർവതങ്ങളിൽ 28 മുതൽ 33 ഡിഗ്രി സെൽഷ്യസ് വരെയും ഉയരും.

തീരപ്രദേശങ്ങളിലും ദ്വീപുകളിലും ഈർപ്പം 70-90 ശതമാനവും ആന്തരിക പ്രദേശങ്ങളിൽ 65-80 ശതമാനവും ഉയർന്നതായിരിക്കും. തെക്കുകിഴക്ക് മുതൽ വടക്ക് പടിഞ്ഞാറ് ദിശയിൽ 10 മുതൽ 30km/hr വേഗതയിൽ നേരിയതോ മിതമായതോ ആയ കാറ്റ് പ്രതീക്ഷിക്കാം. അറേബ്യൻ ഗൾഫിലും ഒമാൻ കടലിലും കടൽ താരതമ്യേന ശാന്തമായിരിക്കും.

ഇന്നലെ പുലർച്ചെ 1.45ന് അൽ ഐനിലെ റക്‌നയിൽ 21.1 ഡിഗ്രി സെൽഷ്യസാണ് രാജ്യത്ത് ഏറ്റവും കുറഞ്ഞ താപനില രേഖപ്പെടുത്തിയത്. ഉച്ചയ്ക്ക് 12.45 ന് അൽ ദഫ്ര മേഖലയിലെ ജബൽ അൽ ധന്നയിലാണ് ഏറ്റവും ഉയർന്ന താപനിലയായ 44.3 ഡിഗ്രി സെൽഷ്യസ് രേഖപ്പെടുത്തിയത്.