ഗ്ലോബൽ ഇന്നൊവേഷൻ ഇൻഡക്‌സ് 2023 ൽ നേട്ടമുണ്ടാക്കി ഗൾഫ് രാജ്യങ്ങൾ; ആദ്യ അമ്പതിൽ ഈ മൂന്ന് ഗൾഫ് രാജ്യങ്ങൾ

ദുബൈ: ഗ്ലോബൽ ഇന്നൊവേഷൻ ഇൻഡക്‌സ് (GII) 2023-ൽ ഏറ്റവും നൂതനമായ അറബ് രാജ്യമായി യുഎഇ വീണ്ടും തെരഞ്ഞെടുക്കപ്പെട്ടു. 130-ലധികം രാജ്യങ്ങളുടെ പട്ടികയിൽ യുഎഇ 38-ാം സ്ഥാനത്താണ്. ഗൾഫ് രാജ്യങ്ങളിൽ ഏറ്റവും ഉയർന്ന റാങ്ക് നേടിയ യുഎഇക്കൊപ്പം സഊദി അറേബ്യയും ഖത്തറും ആദ്യ അമ്പതിൽ ഇടം പിടിച്ചു. യുഎന്നിന്റെ വേൾഡ് ഇന്റലക്ച്വൽ പ്രോപ്പർട്ടി ഓർഗനൈസേഷൻ (WIPO) ബുധനാഴ്ചയാണ് റിപ്പോർട്ട് പുറത്തിറക്കിയത്.

ഇൻഫർമേഷൻ ആൻഡ് കമ്മ്യൂണിക്കേഷൻ ടെക്‌നോളജി (ഐ.സി.ടി) ആക്‌സസ്, ഐസിടി ഉപയോഗം, ബിസിനസ് ചെയ്യുന്നതിനുള്ള നയങ്ങൾ, ആഗോള കോർപ്പറേറ്റ് ഗവേഷണ-വികസന, ആഗോള ബ്രാൻഡ് മൂല്യം എന്നിവയിലെ പ്രകടനമാണ് സഊദിയെ ആദ്യ അമ്പതിൽ എത്തിച്ചത്. 48-ാം സ്ഥാനത്താണ് സഊദി അറേബ്യ. ഖത്തർ 50-ാം സ്ഥാനത്തെത്തി.

മറ്റു ഗൾഫ് രാജ്യങ്ങളായ കുവൈത്ത് 64-ാം സ്ഥാനത്തും ബഹ്‌റൈൻ 67-ാം സ്ഥാനത്തും ഒമാൻ 69-ാം സ്ഥാനത്തുമാണ്. മിഡിൽ ഈസ്റ്റിൽ നിന്നുള്ള ജോർദാൻ 71-ാം സ്ഥാനത്തും ഈജിപ്ത് 86-ാം സ്ഥാനത്തുമാണ്.

ഗ്ലോബൽ ഇന്നൊവേഷൻ ഇൻഡക്സ്

വാർഷിക റാങ്കിംഗ് പ്രകാരം സ്വിറ്റ്‌സർലൻഡ്, സ്വീഡൻ, യുഎസ്, യുകെ, സിംഗപ്പൂർ എന്നിവയാണ് 2023-ൽ ഏറ്റവും നൂതനമായ സമ്പദ്‌വ്യവസ്ഥകളായി തെരഞ്ഞെടുക്കപ്പെട്ടത്.

130-ലധികം സമ്പദ്‌വ്യവസ്ഥകളിൽ 80 സൂചകങ്ങൾ ഉപയോഗിച്ചാണ് ആഗോള ഇന്നൊവേഷൻ ട്രെൻഡുകൾ ട്രാക്കുചെയ്യുന്നത്. റിപ്പോർട്ട് പ്രകാരം 21 സമ്പദ്‌വ്യവസ്ഥകൾ അവരുടെ വികസന നിലവാരവുമായി താരതമ്യപ്പെടുത്തുമ്പോൾ പ്രതീക്ഷിച്ച രീതിയിൽ നവീകരണത്തിൽ മികച്ച പ്രകടനം കാഴ്ചവച്ചതായി വെളിപ്പെടുത്തി.

ഈ വർഷത്തെ റിപ്പോർട്ട് കോവിഡ്-19-ന് ശേഷമുള്ള പാൻഡെമിക് വീണ്ടെടുക്കൽ, ഉയർന്ന പലിശനിരക്ക്, ഭൗമരാഷ്ട്രീയ സംഘർഷം എന്നിവയുടെ പശ്ചാത്തലത്തിലാണ് വരുന്നതെന്ന് WIPO പറഞ്ഞു. റഷ്യ-ഉക്രെയ്ൻ യുദ്ധത്തിന്റെ പശ്ചാത്തലവും റിപ്പോർട്ട് പരിഗണിച്ചിരുന്നു.