നീലേശ്വരം (കാസര്‍കോട്): പാര്‍സല്‍ ലോറിയും സ്‌കൂട്ടറും കൂട്ടിയിടിച്ച് പ്ലസ് ടു വിദ്യാര്‍ഥിയും സുഹൃത്തും മരിച്ചു. കനകപള്ളി തുമ്പയിലെ പരേതനായ അമ്പാടി അമ്മാളു ദമ്പതികളുടെ മകന്‍ മണികണ്ഠന്‍ (18), നാരായണന്‍ ശാരദ ദമ്പതികളുടെ മകന്‍ ഉമേഷ്(22) എന്നിവരാണ് മരിച്ചത്.
ബുധനാഴ്ച വൈകിട്ട് ആറരയോടെ പരപ്പ, കനകപ്പള്ളിയില്‍ ആണ് അപകടം.

വെള്ളരിക്കുണ്ട് ഭാഗത്ത് നിന്നും പരപ്പയിലേക്ക് പോവുകയായിരുന്ന സ്‌കൂട്ടറും എതിരേ വരികയായിരുന്ന പാര്‍സല്‍ ലോറിയും കൂട്ടിയിടിക്കുകയായിരുന്നു. പരുക്കേറ്റ രണ്ടു പേരേയും നാട്ടുകാര്‍ ഉടന്‍ പരപ്പയിലെ സ്വകാര്യ ആശുപത്രിയില്‍ എത്തിച്ചെങ്കിലും നില ഗുരുതരമായതിനാല്‍ കാഞ്ഞങ്ങാട് ജില്ലാ ആശുപത്രിയിലേക്ക് കൊണ്ടു പോകും വഴിയാണ് ഇരുവരും മരിച്ചത്. ഉമേഷാണ് സ്‌കൂട്ടര്‍ ഓടിച്ചത്.

ഇടിയുടെ അഘാതത്തില്‍ രണ്ട് പേരും റോഡിലേക്ക് തെറിച്ചു വീണു. സ്‌കൂട്ടര്‍ പൂര്‍ണമായും തകര്‍ന്നു. മൃതദേഹങ്ങള്‍ കാഞ്ഞങ്ങാട് ജില്ലാ ആശുപത്രി മോര്‍ച്ചറിയിലേക്ക് മാറ്റി. മണികണ്ഠന്‍ വള്ളിക്കടവ് ഗവ. ഹയര്‍ സെക്കന്‍ഡറിസ്‌കൂളിലെ പ്ലസ് ടു വിദ്യാര്‍ഥിയാണ്. അനിതയും അനീഷും മണികണ്ഠന്റെ സഹോദരങ്ങളാണ്. ഉണ്ണിമായ, ഉണ്ണികൃഷ്ണന്‍ എന്നിവരാണ് ഉമേഷിന്റെ സഹോദരങ്ങള്‍.