തിരുവനന്തപുരം: നെയ്യാറ്റിന്‍കരയില്‍ സ്‌കൂട്ടറില്‍ പോകുന്ന യുവതിയുടെ മാല മോഷ്ടാക്കള്‍ തട്ടിപ്പറിച്ചു. സംഭവത്തില്‍ വീട്ടമ്മ ലിജിയുടെ മാലയ്ക്ക് പകരം ബോബി ചെമ്മണ്ണൂരിന്റെ വക സ്വര്‍ണമാല. 

ജീവിതത്തിലെ സമ്പാദ്യം മുഴുവന്‍ സ്വരുക്കൂട്ടി വച്ചു വാങ്ങിയ മാല പോയതിന്റെ വിഷമം ലിജി കരഞ്ഞു പറഞ്ഞത് ടിവിയിലൂടെ കണ്ടതോടെയാണ് ബോബി ചെമ്മണ്ണൂരിന്റെ സഹായം. പണയത്തില്‍ നിന്നെടുത്ത മാല ഒന്ന് ഇട്ടു നടന്ന് ആശ തീരും മുന്നേ, ബൈക്കിലെത്തിയ സംഘം മാലപൊട്ടിച്ച് കടന്നുകളഞ്ഞു. എന്തു ചെയ്യണമെന്നറിയാതെ, നിന്ന കുടുംബം അപ്പോഴും പറഞ്ഞത് പ്രതിക്കെതിരെ കേസ് എടുത്തില്ലെങ്കിലും മാല കിട്ടിയാല്‍ മതിയെന്നാണ്. ഇതോടെ നഷ്ടപ്പെട്ട മാലയ്ക്ക് പകരം മറ്റൊരു മാല സമ്മാനമായി ബോബി നല്‍കിയത്. സന്തോഷമായെന്ന് കുടുംബം.

കഴിഞ്ഞയാഴ്ചയായിരുന്നു സ്‌കൂട്ടറില്‍ പോവുകയായിരുന്ന ലിജിയുടെ പിന്നാലെ ബൈക്കില്‍ എത്തിയ സംഘം മാല പൊട്ടിച്ച് കടന്നു കളഞ്ഞത്. ഇതിനിടെയുണ്ടായ മല്‍പിടിത്തത്തില്‍ നിലത്ത് വീണ ലിജിക്ക് പരുക്കേല്‍ക്കുകയും ചെയ്തു. പ്രതികള്‍ക്കായി പൊഴിയൂര്‍ പൊലിസ് അന്വേഷണം നടത്തുന്നുണ്ടെങ്കിലും ഇതുവരെയും കണ്ടെത്താനായില്ല.