ന്യൂഡല്‍ഹി: മറ്റു പിന്നോക്ക വിഭാഗത്തില്‍ (ഒ.ബി.സി) ഉള്‍പ്പെടുത്തുന്നവരുടെ പട്ടിക സംസ്ഥാനങ്ങള്‍ക്ക് തീരുമാനിക്കാമെന്ന ഭരണഘടനാ ഭേദഗതിയെ പിന്തുണച്ച് പ്രതിപക്ഷം. പെഗാസസ്, കര്‍ഷക സമരം തുടങ്ങിയ വിഷയങ്ങളില്‍ കേന്ദ്രസര്‍ക്കാരിനെതിരേ പാര്‍ലമെന്റില്‍ തുടര്‍ച്ചയായി പ്രതിഷേധിച്ച് വരുന്നതിനിടെയാണ് ഈ സമ്മേളനത്തില്‍ ഇതാദ്യമായി കേന്ദ്രത്തിന്റെ ഒരുനടപടിക്ക് പ്രതിപക്ഷ പിന്തുണ ലഭിച്ചത്.

ഒ.ബി.സി പട്ടിക തിരുത്താന്‍ പാര്‍ലമെന്റിന് മാത്രമേ കഴിയൂ എന്ന് മേയില്‍ സുപ്രിംകോടതി ഉത്തരവിട്ട സാഹചര്യത്തിലാണ് കേന്ദ്രസര്‍ക്കാരിന്റെ നടപടി. സംവരണാര്‍ഹരായ ഒ.ബി.സി പട്ടികയില്‍ ഏതൊക്കെ വിഭാഗങ്ങളെ ഉള്‍പ്പെടുത്തണമെന്ന് തീരുമാനിക്കാന്‍ സംസ്ഥാനങ്ങള്‍ക്ക് അധികാരം നല്‍കുന്നതാണ് ബില്ല്. 127-ാമത് ഭരണഘടനാ ഭേദഗതി ബില്ലാണിത്. ഭരണഘടനാ ഭേദഗതി പാസാക്കണമെങ്കില്‍ സഭയില്‍ മൂന്നില്‍ രണ്ടു ഭൂരിപക്ഷം വേണം. പ്രതിപക്ഷത്തിന്റെ പിന്തുണകൂടി ലഭിച്ചതോടെ ഇനി സര്‍ക്കാരിന് അതൊരു കടമ്പയല്ല.

അതേസമയം പെഗാസസ്, കാര്‍ഷികനിയമം അടക്കമുള്ള വിഷയങ്ങളില്‍ പ്രതിഷേധം തുടരണമെന്ന് രാജ്യസഭാ പ്രതിപക്ഷ നേതാവ് മല്ലികാര്‍ജുന്‍ ഖര്‍ഗെയുടെ ഓഫിസില്‍ നടന്ന യോഗത്തില്‍ പ്രതിപക്ഷകക്ഷികള്‍ തീരുമാനിച്ചു.