ആരോഗ്യമന്ത്രിയുടെ ഓഫീസുമായി ബന്ധപ്പെട്ട നിയമനതട്ടിപ്പ്; കോഴിക്കോട് സ്വദേശിയായ അഭിഭാഷകന്‍ അറസ്റ്റില്‍

തിരുവനന്തപുരം: ആരോഗ്യ മന്ത്രിയുടെ ഓഫീസുമായി ബന്ധപ്പെട്ട നിയമന തട്ടിപ്പ് കേസില്‍ ആദ്യ അറസ്റ്റ്. അഭിഭാഷകനായ കോഴിക്കോട് സ്വദേശി റയീസാണ് പിടിയിലായത്. കേസില്‍ പ്രതിക ചേര്‍ക്കപ്പെട്ട അഖില്‍ സജീവിന്റേയും ലെനിന്‍ രാജിന്റേയും അടുത്ത സുഹൃത്താണ് ഇയാള്‍.

മണിക്കൂറുകള്‍ നീണ്ട ചോദ്യം ചെയ്യലിനു ശേഷമാണ് അറസ്റ്റ്. ആയുഷ് മിഷന്റെ പേരില്‍ വ്യാജ ഇ മെയില്‍ ഉണ്ടാക്കിയത് റയീസാണെന്നു അന്വേഷണ സംഘം കണ്ടെത്തി. തട്ടിപ്പിന്റെ ഗൂഢാലോചനയില്‍ ഇയാള്‍ക്ക് വലിയ പങ്കുണ്ടെന്നും പൊലീസ് പറയുന്നു.

പരാതിക്കാരനായ ഹരിദാസിന്റെ മരുമകള്‍ക്ക് ലഭിച്ച ജോലിയുടെ പോസ്റ്റിങ് ഓര്‍ഡര്‍ വന്നത് ഒരു ഇ മെയില്‍ ഐഡിയില്‍ നിന്നാണ്. ഇതു വ്യാജമായിരുന്നു. ഇത് റയീസാണ് നിര്‍മിച്ചത് എന്നാണ് കണ്ടെത്തല്‍. അതേസമയം പരാതിക്കാരനായ ഹരിദാസിന്റെ സുഹൃത്ത് ബാസിതിനേയും കന്റോണ്‍മെന്റ് പൊലീസ് ചോദ്യം ചെയ്തിരുന്നു.