സ്വന്തം ലേഖകൻ
തിരുവനന്തപുരം • മാലിന്യ സംസ്‌കരണവുമായി ബന്ധപ്പെട്ട നിയമലംഘനങ്ങൾ കണ്ടെത്തി നടപടി എടുക്കുന്നതിന് പ്രത്യേക ജില്ലാതല എൻഫോഴ്‌സ്‌മെന്റ് സംവിധാനം ഏർപ്പെടുത്തുമെന്ന് മന്ത്രി എം.ബി. രാജേഷ്.

മിന്നൽ പരിശോധന നടത്തി ഫൈൻ ഈടാക്കാനും ലൈസൻസ് റദ്ദാക്കുന്നതിനും അധികാരമുള്ള സംവിധാനമാണ് ഏർപ്പെടുത്തുന്നത്. തദ്ദേശ സ്ഥാപനങ്ങൾക്കു കീഴിലെ ഹെൽത്ത് എൻഫോഴ്‌സ്‌മെന്റിനു സമാനമായ രീതിയിലായിരിക്കും ഈ സംവിധാനം പ്രവർത്തിക്കുക.

ആദ്യഘട്ടത്തിൽ സംസ്ഥാനത്താകെ 23 സംഘങ്ങൾ പ്രവർത്തിക്കും. പത്തനംതിട്ട, ആലപ്പുഴ, ഇടുക്കി, വയനാട്, കാസർകോട് ജില്ലകളിൽ ഒരു സ്‌ക്വാഡും മറ്റ് ജില്ലകളിൽ രണ്ട് സ്‌ക്വാഡ് വീതവും. പൊലിസ് ഉദ്യോഗസ്ഥനുൾപ്പെടെ മൂന്ന് പേരായിരിക്കും ഓരോ സ്‌ക്വാഡിലും.

മാലിന്യം വലിച്ചെറിയുന്നവർക്കും കത്തിക്കുന്നവർക്കുമെതിരേ സ്‌പോട്ട് ഫൈൻ ഉൾപ്പെടെയുള്ള നിയമനടപടികൾ സ്വീകരിക്കും. മാലിന്യം പൊതുനിരത്തിലോ ജലസ്രോതസുകളിലോ നിക്ഷേപിച്ചാലും നടപടിയുണ്ടാകും. ശുചിമുറി മാലിന്യം, മാലിന്യം വഹിക്കുന്ന പൈപ്പുകൾ തുടങ്ങിയവ ജലസ്രോതസുകളിലേക്ക് തുറന്നുവച്ചവർക്കെതിരെയും നിയമനടപടികൾ സ്വീകരിക്കും.

അറവ് മാലിന്യങ്ങൾ പൊതുഇടങ്ങളിൽ നിക്ഷേപിക്കുന്നതിനെതിരെ നിരീക്ഷണം ശക്തമാക്കും.
വാണിജ്യ/വ്യാപാര/വ്യവസായ ശാലകൾ, ഹോട്ടലുകൾ, സ്ഥാപനങ്ങൾ, മാളുകൾ എന്നിവിടങ്ങളിൽ മാലിന്യ സംസ്‌കരണ സംവിധാനങ്ങൾ പ്രവർത്തിക്കുന്നുണ്ടെന്ന് ഉറപ്പാക്കുകയും ഇല്ലെങ്കിൽ നടപടി സ്വീകരിക്കുകയും ചെയ്യും.

നിരോധിത പി.വി.സി, ഫ്ലക്സ്, പോളിസ്റ്റർ, നൈലോൺ ക്ലോത്ത്, പ്ലാസ്റ്റിത് കലർന്ന തുണി/പേപ്പർ തുടങ്ങിയവയിൽ പരസ്യ/ പ്രചാരണ ബോർഡുകളും ഹോർഡിംഗുകളും ബോനറുകളും ഷോപ്പ് ബോർഡുകളും സ്ഥാപിക്കുന്നില്ലെന്ന് ഉറപ്പുവരുത്തും.
അനധികൃതമായി മാലിന്യം ശേഖരിക്കുന്നവർക്കെതിരെയും പൊതുയിടങ്ങളിലും ജലസ്രോതസുകളിലും നിക്ഷേപിക്കുന്നവർക്കെതിരെയും നിയമനടപടി സ്വീകരിക്കും.