തിരുവനന്തപുരം: സംസ്ഥാനത്തെ 9 ജില്ലകളിലെ 15 തദ്ദേശ വാര്‍ഡുകളിലേക്കു നടന്ന ഉപതെരഞ്ഞെടുപ്പില്‍ എല്‍.ഡി.എഫ് ഏഴും യു.ഡി.എഫ് ആറും സീറ്റുകള്‍ നേടി. ഒരിടത്ത് എല്‍.ഡി.എഫ് സ്വതന്തനും മറ്റൊരിടത്ത് യു.ഡി.എഫ് സ്വതന്ത്രയും വിജയിച്ചു. ബി.ജെ.പി സ്ഥാനാര്‍ഥികള്‍ ഒരിടത്തും വിജയിച്ചില്ല.

പത്തനംതിട്ട, ആലപ്പുഴ, കോട്ടയം, എറണാകുളം, മലപ്പുറം, കോഴിക്കോട്, കണ്ണൂര്‍ ജില്ലകളിലെ 11 ഗ്രാമ പഞ്ചായത്ത് വാര്‍ഡുകളിലും മലപ്പുറം ജില്ലയിലെ ഒരു ബ്ലോക്ക് പഞ്ചായത്ത് വാര്‍ഡിലും തിരുവനന്തപുരം, എറണാകുളം, വയനാട് ജില്ലകളിലെ മൂന്ന് മുനിസിപ്പാലിറ്റി വാര്‍ഡുകളിലുമാണ് ഉപതെരഞ്ഞെടുപ്പ് നടന്നത്. തെരഞ്ഞെടുപ്പ് ഫലം നിര്‍ണായകമായിരുന്ന കണ്ണൂര്‍ ആറളം പഞ്ചായത്തില്‍ എല്‍.ഡി.എഫും മലപ്പുറം വണ്ടൂരില്‍ യു.ഡി.എഫും ഭരണം നിലനിര്‍ത്തി.

നോര്‍ത്ത് മാറാടി, കോഴിപ്പിള്ളി സൗത്ത്, വഴിക്കടവ് എന്നീ എല്‍.ഡി.എഫ് സിറ്റിങ് വാര്‍ഡുകളില്‍ യു.ഡി.എഫ് വിജയിച്ചു. യു.ഡി.എഫ് സിറ്റിങ് വാര്‍ഡുകളായ പല്ലൂര്‍,പഴേരി എന്നിവയില്‍ എല്‍.ഡി.എഫും വിജയിച്ചു.