കൊട്ടാരക്കര: ശുഭയാത്ര പദ്ധതിയുടെ ഭാഗമായി നടന്ന  വാഹന പരിശോധനയില്‍ 308 പേരുടെ ഡ്രൈവിംഗ് ലൈസന്‍സ്
റദ്ദാക്കി.
മദ്യപിച്ചും അപകടകരമായ രീതിയിലും വാഹനം ഓടിച്ചവരുടെ ലൈസന്‍സാണ് റദ്ദാക്കിയത്.  ഇനിയും ചിലരുടെ ലൈസന്‍സ് റദ്ദാക്കാന്‍ മോട്ടോര്‍ വാഹനവകുപ്പിന് നിര്‍ദ്ദേശം നല്‍കിയിട്ടുണ്ട്. പദ്ധതിയുടെ ഭാഗമായി  16,656 വാഹനങ്ങളാണ്  പരിശോധനകള്‍ക്ക് വിധേയമാക്കിയത്.  പദ്ധതി പ്രവര്‍ത്തനങ്ങള്‍ തുടരുമെന്ന് ജില്ലാ പൊലിസ് മേധാവി  വ്യക്തമാക്കി.
സമാപനം ഇന്ന്
കൊട്ടാരക്കര: കൊല്ലം റൂറല്‍ പൊലിസ് ഈ മാസം ആദ്യം മുതല്‍ നടപ്പിലാക്കിവരുന്ന ട്രാഫിക് ബോധവല്‍കരണ മാസാചരണം ശുഭയാത്ര 2016 ന്റെ സമാപന സമ്മേളനം ഇന്ന് രാവിലെ 11 ന് മാര്‍ത്തോമ്മാ ജൂബിലി മന്ദിരത്തില്‍ നടക്കുമെന്ന് റൂറല്‍ പൊലിസ് മേധാവി അജിതാ ബീഗം വാര്‍ത്താസമ്മേളനത്തില്‍ അറിയിച്ചു. റോഡ് സുരക്ഷയുടെ പ്രാധാന്യം ബോധ്യപ്പെടുത്തുന്നതിനുവേണ്ടിയാണ് ഒരു മാസം നീണ്ടുനിന്ന ശുഭയാത്ര പദ്ധതി നടപ്പിലാക്കിയത്.  
ഇതിന്റെ ഭാഗമായി ട്രാഫിക് ബോധവല്‍കരണ ക്ലാസുകള്‍, സെമിനാറുകള്‍, റാലികള്‍, എക്‌സിബിഷനുകള്‍, പെയിന്റിംഗ് മത്സരങ്ങള്‍, കര്‍ശന വാഹന പരിശോധന എന്നിവ സംഘടിപ്പിച്ചു. സമ്മേളനം  അഡ്വ. പി. അയിഷാപോറ്റി എം.എല്‍.എ ഉദ്ഘാടനം ചെയ്യും. കൊട്ടാരക്കര മുന്‍സിപാലിറ്റി ചെയര്‍പേഴ്‌സണ്‍ ഗീതാസുധാകരന്‍ അധ്യക്ഷനാകും.
ഐ.ജി മനോജ് ഏബ്രഹാം മുഖ്യാതിഥിയായിരിക്കും. കൊട്ടാരക്കര ഡി.വൈ.എസ്.പി കൃഷ്ണകുമാര്‍, കൊല്ലം ആര്‍.ടി.ഒ തുളസീധരന്‍പിള്ള, പുനലൂര്‍ ഡി.വൈ.എസ്.പി  എ. ഷാനവാസ്, ഡി.സി.ബി ഡി.വൈ.എസ്.പി എ. അബ്ദുള്‍ റഷി, കൊട്ടാരക്കര ഡി.ഇ.ഒ ശ്യാമള എം.പി, പി.ഡബ്ല്യു.ഡി, അസി. എന്‍ജിനീയര്‍ എ. ജയകൃഷ്ണന്‍, കൗണ്‍സിലര്‍ സൂസന്‍ ചാക്കോ എന്നിവര്‍ പ്രസംഗിക്കും.