കൊല്ലം: കൊട്ടാരക്കര കൈതക്കോട് വേലംപൊയ്കയില്‍ ജലസംഭരണി തകര്‍ന്ന് പരുക്കേറ്റ  യുവതിക്ക് ചികിത്സാ സഹായം നല്‍കുന്നതു സംബന്ധിച്ച് ഇതുവരെ സ്വീകരിച്ച നടപടികള്‍ രേഖാമൂലം സമര്‍പ്പിക്കണമെന്ന് സംസ്ഥാന മനുഷ്യാവകാശ കമ്മീഷന്‍ അംഗം കെ. മോഹന്‍കുമാര്‍ ഉത്തരവിട്ടു.
കഴിഞ്ഞ ജൂണ്‍ 25 നായിരുന്നു അപകടം. ഏഴുവയസുകാരന്‍  അബി ഗബ്രിയേല്‍ മരിക്കുകയും മാതാവ്  ബീന(27)ക്കു പരുക്കേല്‍ക്കുകയും ചെയ്തിരുന്നു.  ബില്‍ അടയ്ക്കാത്തതിനാല്‍  ഇവരെ  കൊല്ലത്തെ സ്വകാര്യാശുപത്രിയില്‍ നിന്നും ഡിസ്ചാര്‍ജ് ചെയ്യാത്തത്  വിവാദമായിരുന്നു.  സര്‍ക്കാര്‍ ഏജന്‍സികളുടെ ഗുരുതര വീഴ്ച കാരണമാണ് ദാരുണ സംഭവം ഉണ്ടായതെന്ന് കമ്മീഷന്‍ ചൂണ്ടിക്കാണിച്ചു. ചികിത്സാ ചിലവ് നല്‍കാതെ   വകുപ്പുകള്‍ക്ക് ഒഴിഞ്ഞുമാറാനാവില്ല.  പവിത്രേശ്വരം പഞ്ചായത്ത് അധികൃതരുടെ ഭാഗത്ത് നിന്നും ആശ്വാസ നടപടികള്‍ ഉണ്ടായില്ലെന്നും കമ്മീഷന്‍ നിരീക്ഷിച്ചു. ജല വിഭവ സെക്രട്ടറി, റവന്യൂസെക്രട്ടറി, കൊല്ലം ജില്ലാ കലക്ടര്‍, പവിത്രേശ്വരം ഗ്രാമപഞ്ചയത്ത് സെക്രട്ടറി എന്നിവര്‍ സെപ്റ്റംബര്‍ 23 ന് കൊല്ലത്ത് നടക്കുന്ന സിറ്റിങില്‍ വിശദീകരണം സമര്‍പ്പിക്കണമെന്ന് കമ്മീഷന്‍ നിര്‍ദ്ദേശിച്ചു.
സിറ്റിങ്  നടത്തും
കൊല്ലം: സംസ്ഥാന മനുഷ്യാവകാശ കമ്മീഷന്‍ അംഗം കെ. മോഹന്‍ കുമാര്‍ ഇന്ന് രാവിലെ 11 ന് കൊല്ലം ഗസ്റ്റ് ഹൗസില്‍  സിറ്റിങ് നടത്തും.