മുംബൈ: മലേഗാവ് സ്ഫോടനക്കേസില്‍ വിചരാണയ്ക്ക് ഹാജരാകാതെ നടന്ന മുഖ്യപ്രതിയും ബി.ജെ.പി എം.പിയുമായ സാധ്വി പ്രഗ്യാ സിങ്ങിനെതിരേ പുറപ്പെടുവിച്ച വാറണ്ട് എന്‍.ഐ.എ കോടതി പിന്‍വലിച്ചു. കേസില്‍ പ്രഗ്യാസിങ് ഹാജരായ സാഹചര്യത്തിലാണ് നടപടി. 
വെള്ളിയാഴ്ചയാണ് പ്രഗ്യാസിങ് കോടതിയില്‍ ഹാജരായത്.

പ്രത്യേക ജഡ്ജി എ.കെ ലഹോതിയുടെ മേല്‍നോട്ടത്തില്‍ വിചാരണ രാവിലെ തുടങ്ങിയെങ്കിലും ഉച്ചയ്ക്ക് 2.30ഓടെയാണ് പ്രഗ്യാസിങ് കോടതിയിലെത്തിയത്. കോടതിയില്‍ തന്റെ അനാരോഗ്യം ചൂണ്ടിക്കാട്ടി മെഡിക്കല്‍ രേഖകളും അവര്‍ ഹാജരാക്കി. പ്രഗ്യാസിങ്ങിന് നടക്കാനും ഇരിക്കാനും,

എന്തിന് ഒപ്പുവയ്ക്കാന്‍ പോലും കഴിയാത്ത സാഹചര്യമാണുള്ളതെന്ന് അവരുടെ അഭിഭാഷകന്‍ കോടതിയില്‍ പറഞ്ഞു. ഇത് കേട്ടാണ് അവര്‍ക്കെതിരായ വാറണ്ട് കോടതി പിന്‍വലിച്ചത്.ഈ മാസമാദ്യമാണ് കേസിന്റെ വിചാരണനടപടികളുമായി ഹാജരാകാത്തിന് മുംബൈയിലെ പ്രത്യേക കോടതി പ്രഗ്യാ സിങ്ങിനെതിരേ വാറണ്ട് പുറപ്പെടുവിച്ചത്.

കേസ് കഴിഞ്ഞമാസം പരിഗണിച്ചപ്പോള്‍ ഹാജരാകണമെന്ന് പ്രഗ്യാസിങ് അടക്കമുള്ള ആറുപ്രതികളോടും ആവശ്യപ്പെട്ടെങ്കിലും അവഗണിച്ചതിനാലായിരുന്നു നടപടി.