മുനമ്പത്ത് ഫൈബര്‍ വള്ളം മുങ്ങി; മൂന്നു പേരെ രക്ഷിച്ചു, നാലുപേരെ കാണാതായി, തിരച്ചില്‍ ഊര്‍ജ്ജിതം

കൊച്ചി: മുനമ്പത്തിനടുത്ത് മത്സ്യബന്ധനത്തിനു പോയ ഫൈബര്‍ വള്ളം കടലില്‍ മുങ്ങി. ഏഴ് മത്സ്യത്തൊഴിലാളികള്‍ അപകടത്തില്‍പ്പെട്ടു. നാലുപേരെ കാണാനില്ല. മൂന്നുപേരെ രക്ഷിച്ചിട്ടുണ്ട്.

മാലിപ്പുറത്തുനിന്ന് മീന്‍പിടിക്കാന്‍ പോയ ബോട്ടാണ് മുങ്ങിയത്. ഇന്നലെ വൈകീട്ട് ആറുമണിയോടെയാണ് അപകടമുണ്ടായത്. മീന്‍ പിടിച്ച് മടങ്ങുന്നതിനിടെ ബോട്ട് തിരയില്‍പ്പെട്ട് മുങ്ങുകയായിരുന്നു.

മറൈന്‍ എന്‍ഫോഴ്‌സ്‌മെന്റ് കോസ്റ്റല്‍ വിങ്ങും പൊലിസും ചേര്‍ന്നാണ് പരിശോധന നടത്തുന്നത്. കാണാതായ നാലു മത്സ്യത്തൊഴിലാളികള്‍ക്ക് വേണ്ടിയുള്ള തിരച്ചില്‍ പുരോഗമിക്കുകയാണ്. രാത്രി ഏറെ വൈകിയും തിരച്ചില്‍ നടത്തിയെങ്കിലും നാലുപേരെ കണ്ടെത്താനായില്ല. പത്ത് നോട്ടിക്കല്‍ മൈല്‍ ദൂരത്ത് വെച്ചാണ് അപകടമുണ്ടായത്. രക്ഷപ്പെടുത്തിയ മൂന്നുപേരെ എറണാകുളം ജനറല്‍ ആശുപത്രിയില്‍ പ്രവേശിപ്പിച്ചു.

മോശം കാലാവസ്ഥയാണ് അപകടകാരണമെന്നാണു പ്രാഥമിക നിഗമനം. ശക്തമായ തിരമാലയില്‍ ബോട്ട് മറിയുകയായിരുന്നുവെന്നാണു വിവരം.