ന്യൂഡല്‍ഹി: ഇന്ത്യന്‍ വംശജനും ഹിന്ദുസമുദായക്കാരനുമായ ഋഷി സുനക് ബ്രിട്ടീഷ് പ്രധാനമന്ത്രിയായതില്‍ ഇന്ത്യക്ക് പാഠങ്ങളുണ്ടെന്ന് കോണ്‍ഗ്രസ് നേതാവ് ശശി തരൂര്‍. ഹിന്ദു, സിഖ്, ബുദ്ധ, ജൈന മതക്കാരല്ലാത്ത ഒരാള്‍ക്ക് ഇന്ത്യന്‍ പ്രധാനമന്ത്രിയാകാന്‍ കഴിയുമോ എന്നും അദ്ദേഹം ചോദിച്ചു. ന്യൂനപക്ഷങ്ങളെ ശാക്തീകരിക്കേണ്ടതിന്റെ ആവശ്യകതയെക്കുറിച്ചുള്ള തന്റെ വാദം എന്‍.ഡി.ടി.വിക്ക് നല്‍കിയ അഭിമുഖത്തിലാണ് തരൂര്‍ മുന്നോട്ടുവച്ചത്.

ലോകത്ത് വളരെ അപൂര്‍വമായി ബ്രിട്ടീഷുകാര്‍ എന്തെങ്കിലുമൊക്കെ ചെയ്തിട്ടുണ്ടെന്ന് അംഗീകരിക്കേണ്ടിവരും. ബ്രിട്ടീഷ് വംശീയതയുടെ വിമര്‍ശകനാണ് ഞാന്‍. പക്ഷേ അവരിപ്പോള്‍ നേതാവായി തെരഞ്ഞെടുത്തത് ഇന്ത്യയില്‍ വേരുകളുള്ള ഒരു ഹിന്ദുവിനെയാണെന്നത് ചെറിയ കാര്യമല്ല. പ്രത്യക്ഷ വംശീയതയുടെ ചരിത്രം പേറുന്നവര്‍ അതിന്റെ ദോഷം ഇതിലൂടെ കഴുകിക്കളഞ്ഞത് അംഗീകരിച്ചേ മതിയാകൂ.' 10 വര്‍ഷം പ്രധാനമന്ത്രിയായ ഡോ. മന്‍മോഹന്‍ സിങ് സിഖുകാരനാണെന്ന് ചൂണ്ടിക്കാട്ടി തനിക്കെതിരേ ട്വിറ്ററില്‍ ഉയര്‍ന്ന വിമര്‍ശനങ്ങള്‍ക്കും അദ്ദേഹം മറുപടി നല്‍കി. സിഖുകാര്‍ മറ്റൊരു മതസ്ഥരാണെന്ന് ഭൂരിഭാഗം ഹിന്ദുക്കളും കരുതുന്നില്ലെന്ന് അദ്ദേഹം പറഞ്ഞു. രാഷ്ട്രപതി സ്ഥാനത്ത് മുസ്‌ലിംകളും സിഖുകാരും വന്ന കാര്യവും അദ്ദേഹം ചൂണ്ടിക്കാട്ടി. ഹിന്ദുത്വ പ്രത്യയശാസ്ത്രം ഇന്ത്യന്‍ ഉപഭൂഖണ്ഡത്തില്‍ ജനിച്ച എല്ലാ മതങ്ങളെയും ഇന്റിക് മതങ്ങളായാണ് കാണുന്നത്. എന്നാല്‍, ഹിന്ദുത്വ അനുയായികള്‍ മറ്റുള്ളവരെ അതേവിധം കാണുന്നില്ല.

ഹിന്ദുത്വ അല്ലെങ്കില്‍ ഹിന്ദു ദേശീയത അതിന്റെ പ്രത്യയശാസ്ത്രമായി ഉയര്‍ത്തിപ്പിടിക്കുന്ന ബി.ജെ.പിക്ക് ഒരു മുസ്‌ലിം എം.പിയും ഇല്ല. സോണിയാഗാന്ധി പ്രധാനമന്ത്രിയാകുമെന്ന ഘട്ടത്തില്‍ അവരുടെ ഇറ്റാലിയന്‍, ക്രിസ്ത്യന്‍ വേരുകള്‍ വിവാദമാക്കിയ സാഹചര്യങ്ങളും, സോണിയ പ്രധാനമന്ത്രിയായാല്‍ തല മൊട്ടയടിക്കുമെന്ന് പറഞ്ഞ അന്തരിച്ച ബി.ജെ.പി നേതാവ് സുഷമാസ്വരാജിന്റെ പ്രസ്താവനകളും അദ്ദേഹം അഭിമുഖത്തില്‍ ചൂണ്ടിക്കാട്ടി.

ബ്രിട്ടീഷുകാര്‍ തങ്ങളുടെ നേതാവായി ഇരുണ്ട തൊലിയുള്ള ഒരു ഹിന്ദുവിനെ തെരഞ്ഞെടുത്തതിനെ ഞാന്‍ അഭിനന്ദിക്കുന്നു. ഇത് നമ്മുടെ സ്വന്തം രാജ്യത്തിലും പ്രതിഫലിപ്പിക്കുമെന്ന് ഞാന്‍ പ്രതീക്ഷിക്കുന്നുവെന്നും അദ്ദേഹം കൂട്ടിച്ചേര്‍ത്തു.