വെള്ളിയാഴ്ചകളിലെ പൊതു പരീക്ഷ മാറ്റിവെക്കാന്‍ മുസ്ലിം സംഘടനകള്‍ ആവശ്യപ്പെട്ടിട്ടില്ല; പിശകു സംഭവിച്ചെന്ന് ന്യൂനപക്ഷ കമ്മീഷന്‍

തിരുവനന്തപുരം: വെള്ളിയാഴ്ചകളിലെ പി.എസ്.സി പരീക്ഷകള്‍ മാറ്റിവയ്ക്കണമെന്ന്് മുസ്‌ലിം സംഘടനകള്‍ ആവശ്യപ്പെട്ടു എന്ന തരത്തില്‍ നടക്കുന്ന വ്യാജപ്രചാരണത്തിനു കാരണം തങ്ങള്‍ക്കു സംഭവിച്ച പിശകെന്ന് വ്യക്തമാക്കി സംസ്ഥാന ന്യൂനപക്ഷ ക്ഷേമ കമ്മിഷന്‍. കഴിഞ്ഞ ദിവസം തിരുവനന്തപുരത്ത് നടന്ന ന്യൂനപക്ഷ സംഘടനാഭാരവാഹികളുടെ യോഗത്തില്‍വെള്ളിയാഴ്ചകളില്‍ നടക്കുന്ന പരീക്ഷകളുടെ സമയക്രമത്തില്‍ മാറ്റം വേണമെന്ന് മാത്രമാണ് സംഘടനകള്‍ ആവശ്യപ്പെട്ടതെന്ന് ന്യൂനപക്ഷ കമ്മിഷന്‍ ചെയര്‍മാന്‍ അഡ്വ.എ.എ റഷീദ് സുപ്രഭാതത്തോട് പറഞ്ഞു.

എന്നാല്‍ യോഗം സംബന്ധിച്ച് വാര്‍ത്താകുറിപ്പ് തയാറാക്കിയ കമ്മിഷന്റെ ഓഫിസിന് പിഴവ് സംഭവിക്കുകയും വെള്ളിയാഴ്ചകളിലെ പരീക്ഷ മാറ്റാന്‍ സംഘടനകള്‍ ആവശ്യപ്പെട്ടു എന്ന തരത്തില്‍ കുറിപ്പ് പുറത്തിറങ്ങുകയുമായിരുന്നു. ഇതിനു പിന്നാലെ വെള്ളിയാഴ്ചകളിലെ പി.എസ്.സി പരീക്ഷകള്‍ക്കെതിരേ മുസ്ലി സംഘടനകള്‍ എന്ന തലക്കെട്ടോടെ വാര്‍ത്തകള്‍ പ്രചരിക്കുകയായിരുന്നു. തങ്ങള്‍ ഉന്നയിക്കാത്ത ആവശ്യം സംബന്ധിച്ച് വാര്‍ത്തകള്‍ വന്നതോടെ മുസ് ലിം സംഘടനാ നേതാക്കള്‍ ഇക്കാര്യം നിഷേധിച്ച് രംഗത്തെത്തുകയും ചെയ്തിരുന്നു.