ന്യൂഡല്‍ഹി: സ്വാതന്ത്ര്യദിനാഘോഷത്തോടനുബന്ധിച്ച് അശോകചക്ര പുരസ്‌കാരത്തിന് ജമ്മു കശ്മിര്‍ പൊലിസിലെ എ.എസ്.ഐ ബാബുറാം അര്‍ഹനായി. മരണാനന്തര ബഹുമതിയായാണ് ബാബുറാമിന് അശോകചക്ര നല്‍കുക. ജമ്മു കശ്മിര്‍ പൊലിസ് കോണ്‍സ്റ്റബിള്‍ അല്‍താഫ് ഹുസൈന്‍ ഭട്ടിന് മരണാനന്തര ബഹുമതിയായി കീര്‍ത്തിചക്രയും പ്രഖ്യാപിച്ചു. കശ്മിരില്‍ തീവ്രവാദികള്‍ക്കെതിരായ പൊലിസ് നടപടിക്കിടെയാണ് ഇരുവരും വീരമൃത്യു വരിച്ചത്. 

ശൗര്യചക്ര പുരസ്‌കാരത്തിന് 15 പേര്‍ അര്‍ഹരായി. മേജര്‍ അരുണ്‍കുമാര്‍ പാണ്ഡെ, മേജര്‍ രവികുമാര്‍ ചൗധരി, ക്യാപ്റ്റന്‍ അശുതോഷ് കുമാര്‍ (മരണാനന്തരം), ക്യാപ്റ്റന്‍ വികാസ് ഖത്രി, റൈഫിള്‍മാന്‍ മുകേഷ് കുമാര്‍, സിപോയ്: നീരജ് അഹ്‌ലാവത്, നാവികസേനയിലെ സച്ചിന്‍ റിയൂപന്‍, ക്യാപ്റ്റന്‍ പ്രേമീന്ദര്‍ അന്റില്‍, വിങ് കമാന്‍ഡര്‍ വരുണ്‍സിങ്, സി.ആര്‍.പി.എഫിലെ ചിതേഷ് കുമാര്‍, മഞ്ജീന്ദര്‍ സിങ്, സുനില്‍ ചൗധരി, ഒഡിഷ പൊലിസിലെ ദേബാഷിഷ് സേത്തി(മരണാനന്തരം), സുധീര്‍കുമാര്‍ തുഡു(മരണാനന്തരം), ജമ്മു കശ്മിര്‍ പൊലിസിലെ ഷഹ്ബാസ് അഹമ്മദ്(മരണാനന്തരം) എന്നിവര്‍ക്കാണ് ശൗര്യചക്ര. 

പാക് ഷെല്ലാക്രമണത്തില്‍ വീരമൃത്യു വരിച്ച മലയാളി സൈനികന്‍ നായിക് അനീഷ് തോമസിന് മരണാനന്തര ബഹുമതിയായി പ്രത്യേക സേനാ പരാമര്‍ശം (മെന്‍ഷന്‍ ഇന്‍ ഡെസ്പാച്ചസ്) ലഭിച്ചു. 

2020 സെപ്റ്റംബര്‍ 16ന് നിയന്ത്രണരേഖയിലെ സുന്ദര്‍ബനി മേഖലയിലുണ്ടായ പാക് ആക്രമണത്തിലാണ് അനീഷ് വീരമൃത്യു വരിച്ചത്.

 മേജര്‍ രാഹുല്‍ ബാലമോഹന്‍, മേജര്‍ അതുല്‍ ജയിംസ്, ക്യാപ്റ്റന്‍ സ്‌നേഹാശിഷ് പോള്‍, സാപ്പര്‍ സി.ബിബിന്‍, സാപ്പര്‍ ജി. ശിവകുമാര്‍ തുടങ്ങിയ മലയാളികളും ധീരതയ്ക്കുള്ള സേനാ പുരസ്‌കാരം നേടി.

ബാബു പണിക്കര്‍, രാജ്കൃഷ്ണ മനു എന്നിവര്‍ക്ക് ധീരതക്കുള്ള നാവിക സേനാ മെഡലും ദീപക് മോഹനന് വായുസേനാ മെഡലും ലഭിച്ചു.