കോഴിക്കോട്: കെ.എം.സി.സി യൂറോപ്യന്‍ യൂനിയന്റെ ആഭിമുഖ്യത്തില്‍ വിവിധ പദ്ധതികളുടെ ഉദ്ഘാടനവും ധനസഹായ വിതരണവും നടത്തി. ഉത്തരേന്ത്യയിലെ പിന്നോക്ക വിഭാഗങ്ങളുടെ വിദ്യാഭ്യാസ, സാമൂഹിക ശാക്തീകരണം ലക്ഷ്യം വച്ചുള്ള ഖുര്‍തുബ പദ്ധതിയിലേക്കുള്ള ധനസഹായം പാണക്കാട് സയ്യിദ് അബ്ബാസലി ശിഹാബ് തങ്ങള്‍ക്ക് കൈമാറി.

 സി.എച്ച് സെന്റര്‍ അന്തേവാസികള്‍ക്കും പാവപ്പെട്ട രോഗികള്‍ക്കുമുള്ള സാമ്പത്തിക സഹായം പാണക്കാട് ഹമീദലി ശിഹാബ് തങ്ങളുടെ സാന്നിധ്യത്തില്‍ പാണക്കാട് സാദിഖലി ശിഹാബ് തങ്ങള്‍ക്ക് കൈമാറി.

 

 ചടങ്ങില്‍ പി. ഉബൈദുല്ല എം.എല്‍.എ, നൗഷാദ് മണ്ണിശ്ശേരി, ഇസ്മാഈല്‍ ഹാജി എടച്ചേരി, അബ്ദുസമദ് മാസ്റ്റര്‍, കെ.എം.സി.സി നേതാക്കളായ നൗഫല്‍ താപ്പി, അബ്ദുല്‍ജമാല്‍ എം.സി, നബീല്‍ ബെല്‍ജിയം, ഫസലുറഹ്മാന്‍ സംസാരിച്ചു. കാരുണ്യ സ്പര്‍ശം പദ്ധതിയുടെ ഉദ്ഘാടനം യൂത്ത്‌ലീഗ് സംസ്ഥാന അധ്യക്ഷന്‍ പാണക്കാട് സയ്യിദ് മുനവ്വറലി ശിഹാബ് തങ്ങള്‍ നിര്‍വഹിച്ചു. ആക്ടിങ് പ്രസിഡന്റ് നൗഫല്‍ താപ്പി ജര്‍മനി അധ്യക്ഷനായി.

തുടര്‍ന്നും ഇത്തരം പ്രവര്‍ത്തനങ്ങള്‍ കൂടുതല്‍ മേഖലകളിലേക്ക് വ്യാപിപ്പിക്കുമെന്ന് പ്രസിഡന്റ് ഡോ. മുഹമ്മദ് അലി കൂനാരി ജര്‍മനി, ജനറല്‍ സെക്രട്ടറി പി. അബ്ദുല്‍ അസീസ് ഓസ്ട്രിയ എന്നിവര്‍ പറഞ്ഞു.