എന്ന് വരുമെന്ന് പ്രവചിക്കുന്നവര്‍ക്ക് ഒരു ലിറ്റര്‍ പെട്രോള്‍ സമ്മാനം

നിലമ്പൂര്‍: ആഫ്രിക്കയിലുള്ള പി.വി അന്‍വര്‍ എം.എല്‍.എയെ എങ്ങനെയെങ്കിലും നാട്ടിലെത്തിക്കാന്‍ രംഗത്തിറങ്ങി കെ.എസ്.യുവും കോണ്‍ഗ്രസ് പ്രവര്‍ത്തകരും. ആഫ്രിക്കയിലുള്ള നിലമ്പൂര്‍ എം.എല്‍.എക്ക് നാട്ടിലേക്ക് മടങ്ങി വരാന്‍ വിമാന ടിക്കറ്റിന് ഒരു രൂപ ചലഞ്ചുമായാണ് കെ.എസ്.യു പ്രവര്‍ത്തകര്‍ മുന്നിട്ടിറങ്ങിയിരിക്കുന്നത്. കെ.എസ്.യു മുനിസിപ്പല്‍ കമ്മിറ്റിയാണ് ഗൂഗിള്‍പേ നമ്പര്‍ സഹിതം ചലഞ്ചുമായി രംഗത്തിറിങ്ങിയിരിക്കുന്നത്. നിയമസഭാ സമ്മേളനം നടക്കുന്ന ഈ സമയത്ത് പോലും നിലമ്പൂരിന് വേണ്ടി സംസാരിക്കാതെ ആഫ്രിക്കയിലേക്ക് ബിസിനസിന് പോയ എം.എല്‍.എ മണ്ഡലത്തിലെ ഒരു കാര്യത്തിനും വേണ്ടി  ഇടപെടുന്നില്ല. 'എം.എല്‍.എയുടെ ആഫ്രിക്കയില്‍ നിന്നുള്ള മടങ്ങി വരവിനായി  വിമാന  ടിക്കറ്റ് ഫണ്ടിലേക്ക് ഒരു രൂപ ഗൂഗിള്‍ പേ ചെയ്യൂ...'എന്ന അഭ്യര്‍ഥനയുമായാണ് പ്രവര്‍ത്തകര്‍ ചലഞ്ചുമായി നടക്കുന്നത്. 

 

പി.വി അന്‍വര്‍ എം.എല്‍.എയെ എന്ന് നാട്ടില്‍ കാണാനാവുമെന്ന് പ്രവചിക്കുന്നവര്‍ക്ക് കരുളായി മണ്ഡലം യൂത്ത് കോണ്‍ഗ്രസ് കമ്മിറ്റി ഒരു ലിറ്റര്‍ പെട്രോളും നേരത്തെ സമ്മാനം പ്രഖ്യാപിച്ചിരുന്നു. സത്യപ്രതിജ്ഞക്ക് ശേഷം അപ്രത്യക്ഷമായ എം.എല്‍.എ ദക്ഷിണാഫ്രിക്കയിലാണ്. നിയമസഭാ രണ്ടാം സമ്മേളനത്തില്‍ ഹാജരില്ലാത്തതും ചര്‍ച്ചാവിഷയമായിട്ടുണ്ട്. പി.വി അന്‍വര്‍ ഇനി എന്ന് നിലമ്പൂര്‍ കാണും? ശരിയുത്തരം വാട്ട്‌സാപ്പ് നമ്പറില്‍ അയക്കുന്നവരില്‍ നിന്ന് തെരഞ്ഞെടുക്കുന്ന അഞ്ച് പേര്‍ക്ക് കേന്ദ്ര-സംസ്ഥാന സര്‍ക്കാരുകളുടെ നികുതിയില്ലാതെ ഒരു ലിറ്റര്‍ പെട്രോള്‍ സമ്മാനമായി നല്‍കുമെന്നാണ് വാഗ്ദാനം. മണ്ഡലത്തിലെ കൊവിഡ് വ്യാപനം സംബന്ധിച്ച വിവിധ യോഗങ്ങളിലും, കാലവര്‍ഷം ശക്തിപ്പെട്ട സമയത്തും എം.എല്‍.എയുടെ അസാന്നിധ്യം ചോദ്യം ചെയ്യപ്പെടുകയാണ്. 

 

പി.വി അന്‍വര്‍ എം.എല്‍.എയെ മണ്ഡലത്തില്‍ എത്തിക്കണമെന്നാവശ്യപ്പെട്ട് ബ്ലോക്ക് കോണ്‍ഗ്രസ് പ്രസിഡന്റ് കെ.സി ഷാഹുല്‍ ഹമീദ് മുഖ്യമന്ത്രിക്ക് നിവേദനവും നല്‍കി. 100 ദിവസമായി എം.എല്‍.എയെ മണ്ഡലത്തില്‍ കാണാനില്ല. 139 എം.എല്‍.എമാരും അവരുടെ മണ്ഡലങ്ങളില്‍ സജീവമായി ഇടപെടല്‍ നടത്തുമ്പോഴാണ് നിലമ്പൂരില്‍ നാഥനില്ലാത്ത സ്ഥിതിയെന്നും നിവേദനത്തില്‍ പറയുന്നു.